
OPEN HEAVENS
MATALA LE LAGI MO LE ASO FARAILE 13 NOVEMA 2026
(tusia e Pastor EA Adeboye)
Manatu Autu: Toe faatulaga e le Atua 2 (Divine repositioning 2)
Tauloto Tusi Paia: Kenese 13:14-15 “Ua fetalai atu fo‘i le ALI‘I, ‘iā Aperamo ‘ina ‘ua te‘a ‘ese‘ese o Lota ma ia: “Se‘i e va‘ava‘ai ia ma ‘ia e iloa atu i le mea ‘e te i ai na, i le itū i matū, ma le itū i saute, sasa‘e, ma sisifo; auā o le lau‘ele‘ele uma ‘ua e iloa atu nei, ‘ou te foa‘iina atu mo oe ma lau fānau e fa‘avauvau.”
Faitauga - Tusi Paia: Mataio 17:1-9
A oo i le taimi e toe faatulaga ai e le Atua se tagata, e lē tatau ona popole lea tagata i ona fili aua e faitalia le Tupu o tupu ma i latou. I le 1 Tupu 19:1-8, ina ua toe faatulaga e le Atua Elia i luga o le Mauga o Horepa, i le nofoaga na ia toe faatulaga ai Mose, e lei toe sola ese Elia mai soo se tagata. O le mea moni, o loo faaalia i le 1 Tupu 21:20-24, na ia alu atu ma le loto toa i le tupu o Isaraelu ma logo o ia i le faamasinoga a le Atua.
E masani i le Atua ona toe faatulaga tagata ina ia mamao la latou vaai. A e tu i le tumutumu mauga mo se faataitaiga, e mamao atu lau vaai pe a faatusa i le tagata o loo tū i le vanu. Afai na e malaga i se vaalele, e te iloa ai o le maualuga lava e lele ai le vaalele o le mamao foi lena o mea e te iloa atu. I le Kenese 13:14-17, na faailoa manino e le Atua ia Aperaamo, e na te maua mea uma e na te vaai atu iai. Ona ia faatonu lea o ia e aua le tū i le mea e tasi, ae ia savali i le lautele ma le mamao o le laueleele, e na te foai atu ia te ia mea uma e vaai atu iai.
E iai taimi, a toe faatulaga e le Atua se tagata, e na te faia ina ia iloa e le tagata e lē o se mea masani. E na te faia ia iloa e le tagata mea uma ua ia saunia mo ia. I le faitauga mai le Tusi Paia o le asō, na afio le Alii ma ave ona soo e toatolu i luga o le mauga na liua ai Iesu ina ia vaai atu i mea e le masani ona vaai iai mata. Na latou vaai atu i le Alii ua liua, ua latou iloa atu foi Mose ma Elia, o e ua maliliu mo le tele o tausaga. Na latou vaai atu i mea e lē mafai e mata faaletino ona iloa atu aua na toe faatulagaina i latou i luga o le mauga.
I le Mareko 5:35-43, ina ua finagalo lo tatou Alii o Iesu Keriso e faaali atu ia Peteru, Iakopo ma Ioane pe faapefea ona faatu ē ua oti, na ia toe faatulaga lelei i latou. Ina ua latou taunuu atu i le fale o Iairo, na ia tuua le toatele i fafo ae faataga le toatolu lea e o atu ma ia i totonu o le fale, na iai ma molimau le au soo e toatele i le faatuina o le afafine o Iairo mai le oti. I le tele tausaga mulimuli ane, i le Galuega 9:36-41, ao sauni atu Peteru e toe faatu mai Toreka mai i le oti, na ia mulimuli i le faataitaiga na faia e Iesu.
Le au pele, e finagalo le Atua e faatulaga oe i le tumutumu mauga, ma o lenā faatumutumuga o se nofoaga e fausia ai le mafutaga lelei ma ia. Ua e sauni ea e toe faatulaga oe?
Tatalo
Tamā, faamolemole toe faatuga lelei a’u ina ia ou vaai ma maua le siitia pea o faamanuiaga mai ia te oe, i le suafa o Iesu, Amene
D'autres épisodes de "Samoan Devotional"



Ne ratez aucun épisode de “Samoan Devotional” et abonnez-vous gratuitement à ce podcast dans l'application GetPodcast.








