Samoan Devotional

OPEN HEAVENSMATALA LE LAGI MO LE ASO LUA 10 NOVEMA 2026(tusia e Pastor EA Adeboye) Manatu Autu: E mana’omia e le Atua au punaoa (He needs your resouces) Tauloto Tusi Paia: Malaki 3:10 “Inā ‘aumaia mea e sefulua‘i a ‘outou mea uma lava i le fale e tu‘u ai mea; ‘ina ‘ia i ai mea e ‘ai i lo‘u fale; ma ‘ia ‘outou tofotofo mai ai ‘iā te a‘u i lenei mea, ‘ua fetalai mai ai le ALI‘I o ‘au; pe ‘ou te lē tōina pupuni o le lagi mo ‘outou ma sasa‘a atu le manuia mo ‘outou, ‘ina se‘ia silisili ‘ona tele.”Faitauga - Tusi Paia: 1 Tupu 17:8-16Na tuuina mai e Iesu lona soifua mo i tatou, o lona uiga e tatau ona tatou talia gofie le tuuina atu o tatou punaoa ia te ia. Afai o oe ose afafine/atalii o le Atua, e tatau ona fai lelei sau faaiuga e auauna ia te ia i mea uma o loo ia te oe. Afai o le Atua o le puna o mea uma o loo e maua, e lē tatau la ona taofia se mea mai ia te ia. O le faataitaiga lelei o le Aposetolo o Paulo na malamalama lelei o lona ola ma mea uma ia te ia, e lē o toe ia te ia, ae ua ia Keriso. Na ia faaalia manino lea i le Kalatia 2:20 “‘Ua fa‘asatauroina fa‘atasi i mā‘ua ma Keriso; ‘ou te lē toe ola a‘u, a o Keriso o lo‘o ola i totonu ‘iā te a‘u; o le ola fo‘i ‘ou te ola ai nei i le tino, ‘ou te ola ai lava i le fa‘atuatua i le Alo o le Atua, o lē na alofa mai ‘iā te a‘u, ma foa‘iina mai e ia o ia mo a‘u.”Afai o oe o se atalii/afafine o le Atua, o le ola o loo e soifua ai, e lē o toe ia te oe. Na faatauina oe e Iesu i lona toto, o lona uiga e lē tatau ona iai se mea e telē tele mo oe e te lē tuua atu ia te ia. I le faitauga mai le Tusi Paia o le asō, sa oo atu se oge tele i le nuu, ae na auina atu e le Atua Elia i le fafine ua oti lana tane i Sarefata e tausia o ia i le taimi o le oge. E te ono manatu o se fafine ua oti lana tane o le a auina atu iai Elia e mauoa, ae leai, e tuufaafegai. Sa matua mativa na pau le mea na ia te ia o se toe meaai mo ia ma lana tama, ae na fai iai le Atua e tuu ma Elia. E ui i le lē tagolima, ina ua fai atu Elia e sauni mai sana meaai, na loto malie e na te faia. O lona loto malie ma saunia lelei e lafoai mea uma, na faateleina ai e le Atua mea sa ia te ia. E lē faapea e tau na o le faaaoga e le Atua o tagata e aunoa ma le tauia o i latou. A e tuuina atu ia te ia punaoa o loo ia te oe, e na te faamanuia ia te oe e sili atu i ou manatunatuga. E leai se mea e te foaiina i le Alii e tumau i le mea o iai, e faateleina, ma o le a faamanuiaina nisi ona o oe. O a’u ma la’u avā o se tautinoga ola i lenei upu moni. Le au pele e, a fai atu le Atua ia te oe i au punaoa, ia e faitauina o se avanoa maualuga aua e na te pulea mea uma ( Salamo 24:1). Fai mai le Hakai 2:8 o loo ia te ia le auro ma le ario. E fai mai foi le Salamo 50:10-12, o le lalolagi atoa o ia e ona. Afai o le Atua matautia e ona le lalolagi ma mea uma o iai, e fai atu ia te oe e faaaoga au mea mo lana galuega, o loo ia saunia oe mo faamanuiaga tetele. E lē aitalafu o ia i se tagata, ma o i latou e loto malie e faaaoga a latou punaoa mo ia, e latou te maua le faulai o ana punaoa e tele, i le suafa o Iesu, Amene. 

OPEN HEAVENSMATALA LE LAGI MO LE ASO GAFUA 9 NOVEMA 2026(tusia e Pastor EA Adeboye) Manatu Autu: E mana’omia e le Atua ou vae (He needs your legs) Tauloto Tusi Paia: Roma 10:15 “Pe fa‘apefea fo‘i ‘ona latou tala‘i atu, pe ‘āfai ‘ua lē ‘a‘auina atu i latou? Pei ‘ona tusia, “E matagofie na‘uā o latou vae o ē ‘aumai le tala lelei i le manuia.”Faitauga - Tusi Paia: Mataio 28:18-20E manaomia e le Atua vae o kerisiano faatuatua ina ia talai atu le talalelei i le lalolagi atoa. I le faitauga mai le Tusi Paia o le asō, o le poloaiga a Iesu e faapea, ‘o lenei, ia outou o atu..’. O fanau moni a le Atua, e lē na o le nofonofo i latou nofoaga saogalemu ma le mafanafana ma faapea, e na o le pau lava lea o le mea e mafai ona latou faia e auauna ai i le Atua. Afai o oe o se tagata galue i lau ekalesia, o se tulaga lelei, peitai o lou tulaga mafanafana lena. Ua e alu ea i se galuega talai muamua? Ua e faasoa atu ea le talalelei i pagota? Ua e asiasi atu ea i se nofoaga o nonofo ai tamaiti matua oti ma faasoa atu iai le alofa o le Atua? Ua e asiasi atu ea i vaega matitiva o le atunuu ma talai atu le talalelei iai latou e vaivai le tamaoaiga ma lē tauoloa? Afai o lau tali o le ioe i fesili uma nei, e mafai ona ou fesili atu poo anafea na gata ai, pe faafia foi ona e faia? E manaomia e le Atua ou vae e avatu o ia i nei nofoaga ma fesoasoani e tatai mai tagata ia te ia. Fai mai le Roma 1:16 “Auā ‘ou te lē mā i le tala lelei ‘iā Keriso; auā o le mana lava lea o le Atua e ola ai i latou uma o ē fa‘atuatua, e muamua le Iutaia, ‘atoa ma le Eleni.”O loo faamatala e le Ioane 4:5-29, le tala i le fafine Samaria na feiloai ma Iesu i le vaieli. Ina ua maea ona faasoa atu iai e Iesu le talalelei o le faaolataga, fai mai le Tusi Paia na alu atu o ia i le taulaga ma talai atu i tagata uma e faapea, “Inā ō mai ia; ‘inā va‘ai i le tagata ‘ua ta‘u mai e ia ‘iā te a‘u o mea uma lava ‘ua ‘ou faia; pe lē o le Keriso ‘ea lea?” Na ia faaaogaina lelei ona vae i le taimi lava lea ma talai atu le talalelei. E finagalo le Atua e te faia faapea, o ou vae e tatau ona talai atu le talalelei. Ou te manatua se tamā matua na ma feiloai i Papua New Guinea ua faatumuina i le olioli ina ua ia faalogo i le talalelei. Na maligi ona loimata i le fiafia, uu lou lima ma faapea mai, ‘faafetai mo lou malaga mamao mai e faasoa mai ia te au le olioli o le faaolataga’. E leai se tulaga e sili atu ona malie ai le loto i lo le tagata ua ia maua le lagi ma ua faasaoina mai seoli. Fai mai le Tusi Paia e olioli le lagi i le tagata agasala e toatasi e salamo (Luka 15:7). Le au pele e, e finagalo le Atua e faaaoga ou vae e talai atu ai le olioli o le faaolataga iai latou o loo i le pogisa. Fai mai le Galuega 13:47 “Auā ‘ua fa‘apea ‘ona poloa‘i mai o le Ali‘i ‘iā te i matou, ‘‘Ua ‘ou tofia oe e fai ma malamalama o nu‘u ‘ese, ‘ina ‘ia ‘avea oe ma fa‘aolataga e o‘o i le tulu‘iga o le lalolagi.”, i le suafa o Iesu, Amene. 

OPEN HEAVENSMATALA LE LAGI MO LE ASO SA 8 NOVEMA 2026(tusia e Pastor EA Adeboye) Manatu Autu: E mana’omia e le Atua lou fofoga (He needs your mouth) Tauloto Tusi Paia: Roma 10:14 “O lenei, pe fa‘apefea ‘ona latou vala‘au atu i lē ‘ua latou lē fa‘atuatua i ai? Pe fa‘apefea fo‘i ‘ona latou fa‘atuatua i lē ‘ua latou lē fa‘alogo atu i ai? Pe fa‘apefea fo‘i ‘ona latou fa‘alogo atu, pe ā leai se tala‘i atu?”Faitauga - Tusi Paia: Mareko 16:14-17E finagalo le Atua ia faalogo le lalolagi atoa ia te ia. E finagalo i tagata lē faatuatua ia fanaufouina ma ia latou maua lona alofa (1 Timoteo 2:3-4). Peitai, e na te lē laugaina ni lauga, o lona uiga, e na te manaomia tagata e o atu i le lalolagi ma talai le talalelei. I le Galuega 9:4-5, sa agai atu Paulo i Tamaseko ona ia fetaiai lea ma Iesu. Peitai, na manaomia e Iesu se tagata e talai le talalelei ia Paulo ma taitaia o ia ia faaolaina, o lea na ia fesootai atu ia Anania i se faaaliga ma faatonu i le nofoaga e feiloai ai ma Paulo ( Galuega 9:10-11). O le tauloto mai le Tusi Paia o le asō fai mai e lē mafai e tagata ona faalogo i le talalelei pe talitonu ia Iesu Keriso seiloga e lauga pe talai atu se tagata iai latou. Na valaau Iesu i tagata uma o mulimuli ia te ia e talai le talalelei (Mataio 28:19-20), o lona uiga e leai se mafuaaga tatau e te lē talai ai. Fai mai le Ieremia 1:7 “‘Ona fetalai mai ai lea o le ALI‘I ‘iā te a‘u, “‘Aua ‘e te fa‘apea, ‘O a‘u o le tamaitiiti;’ auā o i latou uma ‘ou te ‘auina atu i ai oe, ‘e te alu lava i ai, o mea uma fo‘i ‘ou te fai atu ai ‘iā te oe, ‘e te fai atu ai lava.” E manaomia e le Alii oe e faaaoga lou fofoga e faailoa atu ai o ia i le lalolagi. E manaomia foi e le Alii oe e faaaoga lou fofoga e faamalolo ai ē mamai ma tutuli temoni. I le Mataio 10:8, fai mai le Tusi Paia, “‘Ia ‘outou fa‘amālōlō i ē mama‘i, fa‘amamā lepela, fa‘atutū i ē ‘ua oti, tutuli i temoni. ‘Ua maua fua ‘outou, ‘ia ‘outou foa‘ifuaina atu.” E na te manaomia foi lou fofoga e te tatalo ma tu i le va mo lou atunuu. I le Esekielu 22:30, na fetalai le Atua, Na ‘ou sā‘ili ‘iā te i latou se tagata na te atia‘eina le pā ma tu i le mea ‘ua lepetia i o‘u luma mo le nu‘u, ‘ina ‘ia ‘ou le fa‘aumatia ai; ‘ae ‘ou te le‘i maua lava.” Ou te tatalo ia aua nei misia oe pe a saili le Atua i se tagata e tu ma tatalo mo lou atunuu. E manaomia e le Atua lou fofoga e vivii ai ia te ia. O loo faatonu mai tatou e le Eperu 13:15 e avatu taulaga o viiga i le Atua ia faifaipea. I le Luka 19:35-40, ina ua ulufale atu Iesu i Ierusalema i se asini. O le motu o tagata ma ona soo ua amata ona vivii ma fai pesega i le Atua ma le leotele ona o galuega matautia ua latou vaai iai. Ua latou folafola i o latou gutu, “Ia manuia le tupu o lo‘o maliu mai i le suafa o le Ali‘i; o le manuia i le lagi, o le vi‘iga fo‘i i mea aupitoaluga.” Ina ua fai atu le au faresaio ia Iesu e taofi tagata mai le faia o viiga, ae tali atu iai Iesu, a mumusu tagata e vivii ia te ia, e vivii vave mai ia maa. Ou te tatalo ia aua nei suia e maa oe i le faia o viiga i le Atua, i le suafa o Iesu. E manaomia e le Atua lou fofoga e faataunuuina ai lona finagalo i le lalolagi, i le suafa o Iesu, Amene. 

OPEN HEAVENSMATALA LE LAGI MO LE ASO TOONAI 7 NOVEMA 2026(tusia e Pastor EA Adeboye) Manatu Autu: E mana’omia e le Atua ou lima (He needs your hands) Tauloto Tusi Paia: Iopu 17:9 “O lē ‘ua amiotonu e tumau pea o ia i lona ala, o ia fo‘i ‘ua mamā ona lima e fa‘aopoopoina pea lona malosi.”Faitauga - Tusi Paia: Salamo 24:1-5 So’o se taimi e finagalo ai le Atua e fai ni faailoga ma vavega i le fogaeleele, na te sailia nisi e mafai ona ia fa’aaogaina. O lana masani e silasila i le tagata e faaavanoa lona taimi mo ia ina ia faataunuuina ai lona finagalo i le lalolagi. O se tasi o galuega e fiafia le Atua e fai o le faamalōlō o e mama’i, ma e masani ona ia faia e ala i lima o i latou ua loto atoatoa ia te ia. Afai o oe o se atalii / afafine o le Atua, e mana’omia e ia ou lima e fa’amālōlō ai e mama’i. Fai mai le Mareko 16:18; e fa‘ae‘e atu fo‘i o latou lima i luga o ē mama‘i, ma fa‘amālōlōina i latou.” Ioe, e mafai ona faamalolo e le Atua le tagata e aunoa ma le fa’aaogāina o se isi peita’i o le tele lava e finagalo o ia e faaaoga lima o lana fanau e fai ai ana galuega mamana. Fai mai le Galuega 19:11. “Ua faia fo’i e le Atua vavega sili i lima o Paulo”. I le upu mai le Tusi Paia ua taua i luga, o le Atua o ia na faia vavega tetele peita’i na ia manaomia lima o Paulo e faataunuu ai. Afai e ofoina atu ou lima I le Atua, o le a ia fa’aaogāina fo’i e fai ai vavega. Peita’i ina ia faaaoga e le Atua ou lima e tatau ona mamā. Ua ta’u mai e le Tusi Paia faitau o le asō ia i tatou le uiga o le mamā o lima. A mama ou lima e lē naunau lou loto I le mea faatauvaa pe tautō fa’a’ole’ole. O tagata e pipii o latou loto i mea faatauva’a e ola fo’i na o fiafiaga o le lalolagi. O I latou nei, latou te faia soosemea tau lava ia maua o latou mana’o ma, fai mai Faataoto 28:10; o le ua faataalise ona mauoa e lē fa’asaoina o ia. E le gata i lea o ē tautō fa’a’ole’ole e lē fa’atuatuaina i latou ma e lē fa’aaogaina e le Atua o latou lima mo lana galuega. Le au pele e, afai e te mana’o e fa’aaogā e le Atua ou lima, ua tatau ona e sauni e ola e tusa ma ana poloaiga. Fai mai la tatou upu tauloto mai le Tusi Paia o le asō o e ua mama ona lima e fa’aopoopoina pea lona malosi. A mama ou lima o le a avea oe ma ipu aoga i aao o le Atua. E tatau fo’i ona ia te oe se loto e mamā (Mataio 5:8) ma le loto malie e faia soosemea e fetalai mai ai ia te oe, pe faigofie pe faigatā (Ioane 2:5). Fai mai 2 Timoteo 2:19 “‘Ae ui lava i lea o le fa‘avae mau o le Atua e tu lava lea, o lo‘o i ai lenei fa‘ailoga, “‘Ua silafia e le Ali‘i ona lava tagata;” ‘atoa ma lea, “‘Ia ō ‘ese i le amio leaga i latou uma o ē ta‘uta‘u le suafa o le Ali‘i.”E manaomia e le Atua ou lima peita’i fa’ato’ā ia fa’aaogā ou lima pe afai e mamā i latou ma leai se pona. Afai e te mana’o e avea oe ma ipu aogā i aao o le Atua e ao ona mamā ou lima. I le suafa o Iesu, Amene.

OPEN HEAVENSMATALA LE LAGI MO LE ASO FARAILE 6 NOVEMA 2026(tusia e Pastor EA Adeboye) Manatu Autu: Tatalo faafetai (Prayer of thanksgiving) Tauloto Tusi Paia: Iakopo 1:17 “o mea lelei uma e foa‘ifuaina mai, ‘atoa ma mea alofa uma e ‘ato‘atoa ‘ona lelei, mai lugā lava ia, e alu ifo mai le Tamā o malamalama, e lē o ‘iā te ia se mea fa‘alētumau po o sina liliu itiiti.”Faitauga - Tusi Paia: Kolose 3:15-17TataloTamā, ou te faafetai ia te oe mo le meaalofa o le ola. Faafetai mo le faauuina o o’u aso i lou alofa tunoa ma le alofa mutimutivale. Tamā, faafetai i lau tausiga ia te au ma foai mai mea uma ou te manaomia e tusa ma le faulai o lou mamalu. Faafetai mo le avea o oe ma ou leoleomamoe lelei ma faamautinoaina e leai se mea ou te mativa ai. Le Alii e, ou te faafetai mo lau puipuiga. Faafetai mo le puipui pea ia te au mai u fanafana e felelei i le ao ma faamai e savavali i le pogisa. Tamā, ou te faafetai mo le meaalofa o lou aiga, ekalesia ma le nuu. Ou te faafetai ia te oe mo mafutaga matagofie ma aogā ua e faamanuia ai ia te a’u. Tamā, ou te faafetai ona o ou manatu ia te a’u. Ou te faafetai aua ua faamautuina lo’u lumanai ona o lou agalelei. Le Alii e, faafetai mo le meaalofa o lau upu ma Agaga Paia. Faafetai mo lou siomia o au e ‘au agelu ma foai mai ia te au o mea uma e tau i le ola ma le amio Atua. Tamā, ou te faafetai ia te oe mo le faamagaloina o au agasala. Faafetai mo le faaali mai o lou alofa mutimutivale ma le toe faafouina o au ia te oe i soo se taimi ou te paū ai ma le au i lou mamalu ma le alofa tunoa. Le Alii e, ou te faafetai i lou alofa tunoa e mafai ai ona tatala avanoa, e aoaoina ai au ia ou ola i se olaga amio Atua ma le amiotonu. Faafetai mo le manumalo i le agasala. Le Alii e, faafetai mo au meaalofa i lou olaga. Faafetai mo le galuega a ou lima ma lou saunia o mea uma ou te manaomia e tusa ma le faulai o lou mamalu e ala ia Iesu Keriso. Tamā, ou te faafetai i lou tali mai ia matou tatalo. Faafetai mo lou mafuta mai pea ia te au ma faafofoga mai ia matou talotaloga. Tamā, ou te faafetai ia te oe mo lau Ekalesia. Faafetai i lou faamanuia mai ia te au o fua eseese o le Agaga, o tulaga e faaali mai e lou Agaga e faapoto ai, e faatupu ai, o mea lelei uma e foa‘ifuaina mai, ‘atoa ma mea alofa uma e ‘ato‘atoa ‘ona lelei,Tamā, faafetai mo lenei masina, o faamanuiaga uma ua e saunia, o le mamalu ma le faaeaina ua e folafola i matou. Faafetai lo matou Atua i lou alofa ma lou agalelei ia tei matou, le suafa o Iesu, amene   

OPEN HEAVENSMATALA LE LAGI MO LE ASO TOFI 5 NOVEMA 2026(tusia e Pastor EA Adeboye) Manatu Autu: Faamamā mo le ola galue e sili atu (Purified for higher service) Tauloto Tusi Paia: Malaki 3:3 “E nofo o ia, o le tunu ma fa‘amamā i le ario; na te fa‘amamāina le fānauga a Levi, na te fa‘ate‘a ‘ese fo‘i le ‘ele‘ele ‘iā te i latou e pei o le auro ma le ario; latou te avatu ai i le ALI‘I le taulaga e fai i le amiotonu.”Faitauga - Tusi Paia: 2 Timoteo 2:20-26A valaau le Atua i tagata, e na te faamama iai latou ae lei auina atu i latou e faia le galuega e auauna ai ia te ia. E talia e le Atua tagata i lo latou tulaga o iai, peitai e na te lē tuua i latou e aunoa ma se suiga, e mafai ona alu atu se tagata i le Atua ma le tele o amioga agasala, peitai afai e fia faaaogaina o ia  mo le galuega a le Atua, e tatau ona latou lafoai muamua ia vaega faaletonu. Le au pele e, e alofa le Atua ia te oe i le tulaga o loo e iai, peitai e lē mafai ona ia faaaogaina oe i le tulaga lena pe afai o loo tumu lou olaga i le agasala. Afai e te naunau e faaaogaina oe i lana tovine, e tatau ona e faataga ia te ia e faamama ia te oe. Tusa pe ua faamamaina oe ma ua aoga i lana galuega, o loo valaau o ia mo leisi tulaga maualuga atu e faamamaina ai. Auā foi o le tele ona faamamaina o se tagata, o le tele foi lena o lona aoga mo lona matai. I le Isaia 6:1-8, na maua se faaaliga e Isaia na ia iloa atu le Alii. Ae lei oo i lea taimi, sa tele valoaga ma faaperofetaga na ia faia i Isaraelu. O ia o se ipu aoga i le aao o lona matai, peitai na finagalo le Atua e siitia o ia i se tulaga e maualuga atu. I lea faaaliga, na ia vaai atu i le Atua Matautia o afio i lona nofoalii mamalu, ona ia iloa lea o lona palapala. E ui na umi se taimi o auauna i le Atua ae lei maua le faaaliga lea, na ia iloa pea lona palapala. O se atalii/afafine o le Atua o loo galue pea ini ona vaivaiga, e mafai ona faaaoga e le Alii i se tulaga, peitai afai e faaaoga e le Alii lea tagata mo se faamoemoega e maualuga atu, e na te faaopoopo le faamamaina o ia. Ina ua vaai atu Isaia i le Alii, na ia alaga atu, “Auē a‘u nei! auā ai a‘u a fano; auā o a‘u o le tagata laugutu leaga”. Na ia iloa e lē agavaa mo le valaau a le Atua i le tulaga i luga atu pe afai e tumau pea i le tulaga o loo iai. Ou te tatalo ia asiasi atu le Alii ia te oe ma faamama ia te oe mo le valaauina i luga atu, i le suafa o Iesu. O le faitauga mai le Tusi Paia o le asō o loo taua ai ituaiga ipu eseese e tatou te maua i le fale o le Atua. E iai ipu auro ma siliva e faaaogaina mo tulaga maualuga aua ua maea ona ui i le faamamaina i le afi, e iai ma ipu e faia i le laupapa ma le palapala mo isi galuega e maualalo ane. E lē filifilia e le Atua le ituaiga ipu e te iai, e te filifilia lava e oe e fua i le mamao e te faatagaina ai le Alii e faamama ia te oe. Fai mai le 2 Timoteo 2:21, ‘ai se tasi e fa‘amamā ‘iā te ia a‘i nei mea, e fai o ia ma ipu e ta‘uleleia, e fa‘asāina, e aogā fo‘i mo le ali‘i, ‘ua saunia mo galuega lelei uma. Le au pele e, ua sauni le Atua e faaeaina oe i le tulaga e sili atu i lana galuega pe afai e lafoai lou ola ia faamamaina e Ia. E iai ea se mea e tatau ona faamamaina ai lou tagata e mafai ai ona faaaoga oe e lou matai i le tulaga e maualuga atu? I le suafa o Iesu, Amene. 

OPEN HEAVENSMATALA LE LAGI MO LE ASO LULU 4 NOVEMA 2026(tusia e Pastor EA Adeboye) Manatu Autu: Faamamā lou tagata (Purify yourself) Tauloto Tusi Paia: Iakopo 4:8 “Ia pule fo‘i le filemū mai ‘iā Keriso i o ‘outou loto, o le mea lea ‘ua vala‘auina ai ‘outou e fai ma tino e tasi ma ‘ia ‘outou saga fa‘afetai.”Faitauga - Tusi Paia: Numera 8:5-11I le tele o tausaga talu ai, sa ou auai i se fonotaga tele a le Ekalesia Penetekoso i Kenya, sa toatele faifeau faauuina ma tautaua i lea vaitau na auai atu iai. E ui e lei valaaulia au i lea fonotaga, na ou auai ai ona o lou fiaai mo le Atua. Ina ua lata ina maea le fonotaga, sa faia se faatalanoaga i le mataupu o le ‘manatunatu loloto (meditation)’. I le taimi o le mataupu lea, na ta e se tagata le kitara ma usuusu pese ao matou tatalo uma i le Agaga Paia. Na ou manatunatu loloto ae ua faateia au ina ua ave au i le lagi. O se faaaliga o loo ou iloa atu aua ou te lē o moe. Ua ave au i se potu telē lava e pei e lapotopoto lona taualuga. O loo iai seisi o loo nofo i se nofoalii e mamao lava ma au. O loo tutū agelu i itu e lua o le potu, e faitau miliona le itu taumatau ma le itu agavale. E matua lapopoa maualuga ma o latou foliga e faigata ona faamatalaina. E lē lanu paepae, e matuā leai a ni upu e faamatala ai. O le pito latalata ou te faamatalaina ai e pei o le vai i totonu o se ipu omea malamalama maoi, e leai seisi upu e faamatala ai lea ituaiga lanu. A ou liliu i le taumatau,o agelu i lou itu taumatau ua sosō i tua. A liliu i le agavale, ua soso foi i tua agelu. E leai ma seisi na faia mai se upu, peitai na tei a ua ou manatu, ia ou suesue ia te au lava. Ina ua ou faia,  ua ou iloa atu ua ou le lavalava ma ua ufitia uma e lapisi, e pei faatoa aumai a’u mai le nofoaga e lafoai ai suavai palapalā. Ina ua ou vaaia lea, ua ou malamalama i le mafuaaga na o ese ai agelu ma au, ona tei a lea ua mou atu lea faaaliga. Ina ua maea ona ou vaai i lea faaaliga, na ou fai i le Atua matautia, ‘a ou toe foi mai i le nofoaga o lou mamalu, ou te lē toe sau palapala’. O le mafuaga lea e faamuamua ai lava le ola faapaiaina ia te a’u. Le au pele e, a aunoa ma le faapaiaina, e leai se tagata e mafai ona vaai i le Atua ( Eperu 12:14). Afai o e ola pea i le agasala, e le mafai ona e iloa atu le Atua, o soo se tagata e le mafai ona vaai atu i le Atua, e lē mafai ona ia saofagā i meaalofa lelei e na o ia e maua ai ( Iakopo 1:17). Aua e te auauna i le Atua ma se loto le mamā. Ua oo i le taimi e te faalatalata ai ia te ia ma ole atu e faamama oe mai soo se mea e taofia oe mai i le iloa atili o ia. A e saili ia te ia ma lou loto atoa, e te maua o ia ( Ieremia 29:13) ona e maua lea o ana faamanuiaga i vaega uma o lou olaga, i le suafa o Iesu, Amene. 

OPEN HEAVENSMATALA LE LAGI MO LE ASO LUA 3 NOVEMA 2026(tusia e Pastor EA Adeboye) Manatu Autu: O le loto faafetai e tatala ai mea faaopoopo (Gratitude unlocks more) Tauloto Tusi Paia: Kolose 3:15 “Ia pule fo‘i le filemū mai ‘iā Keriso i o ‘outou loto, o le mea lea ‘ua vala‘auina ai ‘outou e fai ma tino e tasi ma ‘ia ‘outou saga fa‘afetai.”Faitauga - Tusi Paia: Luka 17:12-19E finagalo le Atua e faaali atu lo tatou loto faafetai ia te ia i taimi uma. O lea loto faafetai e mafai ona faaali atu e ala i tatalo, viiga ma tapuaiga. Fai mai le Salamo 100:4, Ia ‘outou ulu atu i ona faitoto‘a ma le vi‘iga, ma ona lotoā ma le pese. I le faitauga mai le Tusi Paia o le asō, na faamalolo e Iesu lepela e toa 10, ae na o le toatasi na toe foi e faafetai ia Iesu. Ona ia fesili atu lea ia te ia poo fea le isi toaiva. O le mafuaaga e toatele ai tagata latou te le maua le tele o vavega mai le Atua ona latou te leiloa faafetai mo mea ua maea ona ia faia mo i latou. Ina ua matou faatuina le lala muamua o le Ekalesia i se tasi o nuu e taua o Abuja, e tolu aso o faia matou sauniga. Ae lei amata le sauniga muamua, sa ou tatalo i totonu o se faletalimalo ia afio mai le Atua e faia vavega ma ia liliga mai lona mamalu ma le faauuga i a matou sauniga. Na faafuasei ona faapea mai le Atua, ‘tapuni’. Sa ou fiafia aua e ui o se upu tetee mai, ae o loo ou mautinoa o loo ia faafofoga mai. Ona ia faapea mai lea, ‘ua tele au faatonuga i mea ou te faia mo oe. O a’u o sau auauna? Ua e faafetai mai ea i mea e tele ua ou faia mo oe i le tuanai? Na ou faatoese vave ma faapea atu, ‘Le Alii e, ou te faafetai atu i mea ua e faia i le tuanai, peitai faamolemole ia faaopoopo mea e te faia’. Na toe fai mai ia te au e taofi. Ona ia fai mai lea ‘mo aso e tolu o le a sosoo nei, ou te lē fia faalogo i seisi lava mea mai ia te oe, tau lava o le faafetai’. O se luitau tele mo au ae na ou usitai. Ina ua maea aso ia e tolu, na fai mai le Alii e faapea, ‘atalii, alu i le fale, faauu toeaina,ona o lea o latou e aoao tagata i aoaoga a le lotu ina ia malosi lona faavae, aua o le tulaga ua e vaai iai, o le faaopoopo. O le tulaga o le a e sauni e vaai iai o le faateleina’. I le viiga o le Atua, o le Ekalesia RCCG ua matua faateleina i Abuja ma faapena foi i le lalolagi atoa. Le au pele e, afai e te loto faafetai i le Atua, o mea uma ua ia faia, e faaopoopo mea e na te faia e pei ona ia faia i le tamaloa lea na toe foi e faafetai ia Iesu, i le faitauga mai le Tusi Paia o le asō. Faamolemole, aua nei faitauina oe i tagata lē loto faafetai i aso mulimuli (2 Timoteo 3:1-2). A e mafaufau loloto, tusa poo le a le tulaga o loo e iai,  e te maua lava vaega uma e te faafetai ai i le Atua. Aua e te faatali seia aveesea ma oe avanoa matagofie o loo e aeae ai i le taimi nei ona e faatoa faafetai lea i le Atua. E finagalo e te sau i ona luma ma le loto faafetai i taimi uma. Faaavanoa lou taimi e te faafetai ai i le Atua mo mea ua ia faia mo oe i aso uma, i le suafa o Iesu, Amene. 

OPEN HEAVENSMATALA LE LAGI MO LE ASO GAFUA 2 NOVEMA 2026(tusia e Pastor EA Adeboye) Manatu Autu: Viia le Alii (Praise the Lord) Tauloto Tusi Paia: Salamo 98:4 “Ia ‘alalaga i le ALI‘I le lalolagi uma; ‘ia leo tele lava ma ‘ia ‘alalaga fiafia ma ‘ia fai pesega.”Faitauga - Tusi Paia: Salamo 67:5-7E olioli le Alii i viiga a ona tagata. O le mea moni, e matua fiafia i viiga e tietie i viiga a lana fanau (Salamo 22:3). I le Salamo 50:23, na ia fetalai “O lē faia le vi‘iga ma taulaga, o le āva lea ‘iā te a‘u; ma lē ‘ua mafaufau i lona ala, ‘ou te fa‘ailoa atu ‘iā te ia le fa‘aolataga mai le Atua.” O loo faaalia ai le naunau o le Atua i lana fanau e vivii ia te ia. A osi atu le viiga o le Atua e lana fanau, e na te tauina taua mo latou. O le tulaga lea na tupu i le 2 Nofoaiga Tupu 20:1-25, na o mai tupu e toatolu e faasagatau i le tupu o Iosefatu. Na vivii i le Atua tagata o Iuta, ona ia tau lea mo latou. Na faia e le Atua ma iu ina toe fetauai tupu nei e toatolu e aunoa ma le faaaogaina o se pelu e le fanau a Iuta. E le gata i lea, e tolu aso o aoina le oa mai latou fili e Iosefatu ma ona tagata i se taua latou te lei tauina. O seisi faataitaiga o le Atua o loo tau mo ona tagata o vivii ia te ia o loo faamauina i le Galuega 16:25-26  “O le tulua o po ma ao ‘ua tatalo ai ma pepese o Paulo ma Sila, i le Atua; ‘ua fa‘alogo fo‘i ‘iā te i lā‘ua e ‘ua noanoatia. ‘Ona fa‘afuase‘i mai lea o le mafui‘e tele, ‘ua lūlūina ai fa‘avae o le fale puipui; ‘ua matala mai ai uma faitoto‘a, ‘ua maunuunu ai fo‘i o latou noanoagauma lava.”Ou te tatalo ia tau le Atua mo oe ao e vivii ia te ia i le asō, i le suafa o Iesu. Ou te manatua le tala i se uso kerisiano na ia faasoa atu se mealilo i ana seleselega i tausaga uma. Fai mai lea uso, a maea ona totō, e savali solo i lana faatoaga ma usu pese ma viiga i le Atua. A oo i le taimi e  selesele fua o ana faatoaga, e faamanuia le Atua e sili atu i ona manatunatuga uma. Le au pele e, ou te fautuaina oe e te mulimuli i lea faataitaiga lelei. A e faatauina oloa e toe faatau atu, tuu ia oloa i ou luma ma amata ona e vivii i le Atua. Ia faia i lou ofisa, aemaise o lau kesi. Fai ma au masani le faaavanoa o se taimi e te vivii ai i le Atua. Faataitai iai ona e vaai lea i le Atua e na te faatupuina lau pisinisi po lau galuega ina ia e tofo i le faaeaina mai le Atua. Peitai, e lē fia faalogo le Atua i pese ma viiga a tagata agasala ( Ioane 9:31). E lē afaina poo le a le lelei o le pese ma le siva a lea tagata, o le viiga e talia e le Atua e tafe mai le loto ua faamamaina (Salamo 24:3-4). Afai e lei tuuina atu lou ola ia Iesu, faamolemole ia e faia loa, ona e malolo lelei ma le mautinoa, a e vivii ia te ia, e faamanuia le Atua ia te oe, ma ia tauina taua mo oe. Vivii mai le loto faamamaina e tosina mai ai faamanuiaga ma le puipuiga mai le Atua, i le suafa o Iesu, Amene. 

OPEN HEAVENSMATALA LE LAGI MO LE ASO SA 1 NOVEMA 2026(tusia e Pastor EA Adeboye) Manatu Autu: E Pule O Ia 2 (He Is In Control 2) Tauloto Tusi Paia: Salamo 78:45 “Na ia ‘a‘auina atu ‘iā te i latou o garova, na ‘aina ai i latou; o rane fo‘i na fa‘aumatia ai i latou.”Faitauga - Tusi Paia: Faaaliga 12:1-17O ananafi na ou faasoa atu e pule le Atua i le natura o mea ma mea uma i le lalolagi. A iai se tagata i le itu a le Atua, e galue le natura o mea e alofaina o ia. Peitai a tetee atu se tagata i le Atua, e galue tetee le natura o mea i lea tagata. Le au pele e, afaia e te lei tuuina atu lou ola ia Keriso, o loo e tetee i le Atua, o lona uiga o vaega uma o le natura o mea, e mafai ona filifili e galue e tetee ia te oe. E leai seisi taimi lelei i lo le asō e faia ai se suiga o lou olaga ma tuuina atu lou ola ia Iesu, o Lē pulea mea uma. O loo faamatala e le Ieremia 22:28-30 se tagata e igoa ia Konia. O ia o se tupu na ola tetee i le finagalo o le Atua (2 Tupu 24:8-9), ona faatonu lea e le Atua le laueleele, ia tusia e lē fanau. E leai ma se mea na ia faia e mafai ai ona uluola, aua foi ua faatonuina le laueleele mai Lē oi le lagi ia faamautinoa e leai se fanau. O leisi tagata na tetee iai le natura o mea o Sisera, e pei ona tusia i le Faamasino  5:20-21. Na faasaua lenei tagata i tagata o le Atua (Faamasino 4:1-3) ma ina finagalo le Atua e faamasino ia te ia, o fetu o le lagi ua tetee ia te ia e faapena foi le alia o Kisona. E faapena foi Farao, ina ua ia matua musu e tuu le fanauga a Isaraelu e ō, na faaaoga e le Atua vaega eseese o le natura o mea e tau atu ai ia te ia. Na faasagatau atu ni manu ia te ia ( Salamo 78:43-46), ua to mai uatoa e tetee ia te ia, e oo i le la na taofia le susulu mo aso e tolu ona o lona lē usitai ( Esoto 10:21-23. E sili atu le faatu o lou faleie ma Lē e pule o mea uma aua foi e usitai mea uma ia te ia, ma o mea uma e faataunuuina ai folafolaga. O le faitauga mai le Tusi Paia o le asō o loo faamatala ai se fafine ma le tarako. Ina ua foliga mai ua leai seisi faamoemoe, ma e fasiotia le fafine e le tarako, fai mai le Tusi Paia na oo mai le laueleele e fesoasoani ia te ia. Na tatala le gutu o le eleele ma folo uma mea uma mai le Karato. E fesoasoani foi le laueleele iai latou e mulimuli i le Alii ma faia lona finagalo, e alofaina i latou e alolofa i ala amiotonu o le Atua. Ina ua agasala Atamu, na fetuuina le laueeleele ona o ia (Kenese 3:17-19). Peitai o i latou uma ua ia Keriso, ua faasaoina i latou mai le fetuu ma le malaia o le tulafono ( Kalatia 3:13). Le au pele e, ou te tatalo, ao e vivii i le Atua ma faailoa o ia e pule i le lalolagi atoa, e tali mai ia te oe le laueleele ma faateleina mo oe ( Salamo 67:6), i le suafa o Iesu, Amene.