Samoan Devotional podcast

E te ata mulimuli (You will laugh last)

0:00
4:51
Spola tillbaka 15 sekunder
Spola framåt 15 sekunder

OPEN HEAVENS

MATALA LE LAGI MO LE  ASO GAFUA 23 NOVEMA 2026

(tusia e Pastor EA Adeboye)

 

Manatu Autu: E te ata mulimuli (You will laugh last)

 

Tauloto Tusi Paia: Salamo 30:5 “Auā o lona to‘asā ‘ua se ‘emo o le mata lea, a o lona alofa tunoa o le ola lava lea; e afe ane le tagi i le afiafi, a o le ‘alaga fiafia i le taeao.”


Faitauga - Tusi Paia: 1 Samuelu 1:5-20


E iai se faaupuga masani e faapea, ‘o le tagata e ata mulimuli e sili ona lelei’. I le Tanielu 3:1-30, na taupulepule le tiapolo e fasiotia Sataraka, Mesako ma Apeteniko; peitai e maea ane, ua faaeaina i latou. Afai o oe o se afafine poo se atalii o le Atua, aua e te fefe i ē ita mai o loo latou taofia ou avanoa e siitia ai. Ia e malolo ma le mautinoa o lo tatou Atua matautia e tau o ia mo oe. I le Teuteronome 20:4 “Auā o le ALI‘I lo ‘outou Atua tou te ō ma ia, na te tau ai la ‘outou taua ma o ‘outou fili, na te fa‘aolaina ‘outou.” Ou te tatalo ia liua uma taupulepulega a le fili e faasagatau ia te oe, e avea ma avanoa o lou faaeaina. 


Fai mai le Ioane 16:33 “Ua ‘ou fai atu nei mea ‘iā te ‘outou, ‘ina ‘ia ‘outou maua le manuia ‘iā te a‘u; e maua fo‘i ‘outou o le puapuagā i le lalolagi, a ‘ia ‘outou loto tetele, auā ‘ua ‘ou manumālō i le lalolagi.”


O le fuaitau o loo taua i luga e ta’u mai ai iai tatou, e tatou te feagai ma puapuaga i le lalolagi o loo tatou iai. E oo mai puapuaga i aiga, pisinisi, galuega, aoaoga ma isi vaega o lou olaga. Peitai, o loo faamautinoa mai e Iesu Keriso, ua ia manumalo i puapuaga uma i le lalolagi mo oe. O lona uiga, aua e te faatagaina le popole poo le faanoanoaga e taofia oe i lalo, ae tuu lou faatuatuaga i le Alii. O i latou uma na manatu ua uma oe, o le a faateia aua o le a e ata mulimuli. 


I le faitauga mai le Tusi Paia o le asō, ao ula Penina ia Hana ona o le lē fanau, e na te leiloa o ana ulaga na faaosofia ma taitaia Hana i le tulaga e avea ai o ia ma tinā o le perofeta a le Atua, le perofeta e lei i’uvale ana upu na faia (1 Samuelu 3:19). E lē gata na avea Hana ma tinā o Samuelu, na faaopoopo isi ana fanau e toalima (1 Samuelu 2:21). E lē mafai ona galo iai tatou Samuelu, ae e leai seisi e iloaina le fanau a Penina. 


Le au pele e, tusa poo le a le leaga o le tulaga o loo ei iai i le taimi nei, a tuu lou faatuatua i le Atua, e na te faia e te ata mulimuli. E ono tuai ona oo i le taimi e te ata ai, ae e mautinoa e oo mai. O loo faapea mai le tauloto mai le Tusi Paia o le asō, e ui e oo mai le tagi i le afiafi, e oo mai lava le alaga fiafia i le taeao. E na te liua lou tagi i le alaga fiafia ma le siva. E na te liua lou tagitu‘i i le siva; ma tala‘eseina lou ‘ie talatala, ‘ae fusia oe i le fiafia (Salāmo‬ ‭30‬:‭11‬). O lona uiga, aua e te faatagaina le faanoanoaga e fusia lou loto, o loo galue mai le Atua i se fuafuaga matagofie mo oe ma e mautinoa e te ata mulimuli, i le suafa o Iesu. 


Tatalo

Le Alii e, afai o iai se vaega o loo ou faanoanoa ai, faamolemole ia e faia ou te maua le alaga fiafia, i le suafa o Iesu, Amene. 

Fler avsnitt från "Samoan Devotional"