
OPEN HEAVENS
MATALA LE LAGI MO LE ASO SA 22 NOVEMA 2026
(tusia e Pastor EA Adeboye)
Manatu Autu: Le ala e faafouina ai (The process of revival)
Tauloto Tusi Paia: 2 Timoteo 2:21 “O lenei, ‘ai se tasi e fa‘amamā ‘iā te ia a‘i nei mea, ‘ua ta‘uleagaina, e fai o ia ma ipu e ta‘uleleia, e fa‘asāina, e aogā fo‘i mo le ali‘i, ‘ua saunia mo galuega lelei uma.”
Faitauga - Tusi Paia: Sakaria 3:1-7
E pei ona ou fai atu ananafi, o le fanaufouina e tupu vave. E mafai ona faatusaina i se fafine ua ola i le falemai ma maua le pepe i le taeao, ona te’a lea i tua i lona fale i le afiafi. O le toe faafouina, e ui i laasaga ma tapulaa. E pei ona ou taua ananafi, o se fomai e faateia se fatu o se ma’i ia ola ma soifua, e na te lē tuua le ma’i e alu loa i le fale. O le mea muamua e faia e le fomai, o le taofia i le falemai ae sei saili le faapogai o le taofi o le tata o le fatu. I le Luka 15:21-24, ina ua faafeiloai atu e le tamā lona atalii faamaumau oa, o le mea muamua na ia faia, o le faaofu i le ofu talaloa. O loo atagia ai, na aveesea ona ofu tuai. Afai ua le toe iai lou naunautaiga i le Atua, ae ua e toe fia mafuta moni ma ia, o lona uiga, e tatau ona e lafoai le agasala na mafua ai ona tupu le maalili i lou loto. Afai sa e faitaaga, e tatau ona e alo ese mamao ma tagata poo mea foi na faaosoosoina oe e faia le agasala. Tapē ese ma lau telefoni ata e ono faaosoosoina oe i tuinanau o le tino, tapē ma lau telefoni numera a tagata e tatai oe i mea leaga, ma a mafai, sui le nofoaga e te nofo ai. Afai e lē aveesea ma susunuina lena ofu tuai o le agasala, o loo e olegia lava oe pe afai o loo e fai mai e te manaomia le faafouina.
O lona lua, a maea ona aveesea le ofu o le agasala, e tatau ona e taele. E le mafai e le atalii faamaumau oa ona sui lona ofu i se ofu fou ae o loo palapala le tino, e tatau ona taele muamua. Fai mai le Efeso 5:26 e fa‘atā‘eleina i tatou i le vai ‘atoa ma le ‘upu a le Atua. E tatau ona e ola i se olaga e suesue i le upu a le Atua i aso uma.
Mulimuli, e te manaomia ni ofu fou, o lona uiga o se olaga fou. I le faitauga mai le Tusi Paia o le asō, ina ua maea ona aveesea e le agelu ofu palapala a Iosua le ositaulaga sili, na ia faaofu ia te ia i ofu fou ma lapatai malosi ia te ia ia savali i ala o le Atua ma tumau ai. O loo faamalosi mai le Roma 12:1-2 ia ‘tatou tu‘uina atu o ‘tatou tino i le Atua, o le taulaga ola, ma le pa‘ia ma ia liliuina ia toefuataina o tatou loto. O le auala lena e fai ai ou ofu ia mama ma leai se ponā. Le au pele e, o le faafouina e faia i se auala e faasolosolo ae faataga le Upu a le Atua e liliuina ma toefuataina lou olaga ma faafouina lou mafaufau mo le faaaogaina i le galuega a lo tatou Matai, i le suafa o Iesu, Amene.
Fler avsnitt från "Samoan Devotional"



Missa inte ett avsnitt av “Samoan Devotional” och prenumerera på det i GetPodcast-appen.








