euroradio.fm

“Цэнтр новых ідэй” апублічыў вынікі новага даследавання, прысвечанага “аналізу грамадскіх настрояў, эканамічнага становішча, сацыяльнага даверу, медыяспажывання і знешнепалітычных арыентацый беларусаў у 2026 годзе”. І, паводле яго, 87% апытаных задаволеныя сітуацыяй у краіне, а на карысць стасункаў з Расіяй выказалася 70% апытаных. У гэты час Лукашэнка з Пуціным дэманструюць паказное адзінства, гавораць пра ваенную падтрымку і пагрозу з Захаду. Адначасова з Мінска дасылаюць на той самы Захад намёкі пра неабходнасць перагарнуць старонку. Ці варта давяраць лічбам, агучаным ЦНІ, а калі так, то што яны азначаюць для дэмсіл і рэжыму? Ці можна казаць, што перамовы ў Абу-Дабі прадэманстравалі немагчымасць дасягнення міру ва Украіне бліжэйшым часам? Якое месца ў сістэме пасляваеннай бяспекі адводзіцца Беларусі і якая на сёння галоўная задача дэмсіл? Пра гэта і шмат што іншае мы і разважаем у штотыднёвым жывым эфіры Еўрарадыё з палітычным аглядальнікам, гісторыкам Аляксандрам Фрыдманам

Ці затухае амерыканскі трэк і навошта Каржу галасавыя з вайны — Еўразум за 13 лістапада | Новости Беларуси за 13 ноября by Euroradio

Вызваляць палітвязняў, здымаючы з лукашэнкаўскага рэжыму тыя ці іншыя сакцыі, заклікаюць еўрапейскіх палітыкаў як былыя палітзняволеныя, так і частка прадстаўнікоў беларускіх дэмсіл. Таксама праз такі гандаль прапануецца дамагацца ад Лукашэнкі спынення палітычных рэпрэсій. Калі ж рэжым нешта паабяцае, але слова свайго не стрымае, то, кажуць ініцыятары такога звароту, санкцыі Еўрасаюз адразу верне назад. Ці сапраўды знятыя (або замарожаныя) сёння санкцыі заўтра ЕС лёгка зможа вярнуць назад? Калі не для таго гандлю, вынікам якога павінна стаць вызваленне палітвязняў і, у ідэале, спыненне рэпрэсій, то для чаго тыя санкцыі захоўваць? Ці не час дэмсілам рэфармавацца і чым дрэнная ідэя “аб’яднанага штаба дэмсіл”? На гэтыя ды іншыя пытанні ў эфіры Еўрарадыё адказвае мастацкі кіраўнік Беларускага Свабоднага тэатра Мікалай Халезін

Апошнім часам нікога не здзівіш навіной, што з друку выйшла чарговая кніга таго ці іншага беларускага аўтара ці аўтаркі. Тым больш што нагод, каб адрэфлексаваць, выкласці свае думкі і адчуванні ў тэксце, у нас дастаткова. Гэта і турма, і эміграцыя, і вайна, і проста зменлівае жыццё. Тым не менш, на пэўныя кнігі і пэўных аўтараў хочацца звярнуць асаблівую ўвагу. У дадзеным выпадку — на аўтарку. Размова пра Кацярыну Ваданосаву, якая днямі дзякуючы выдавецтву Kamunikat.org стала багацейшая на яшчэ адну кнігу — зборнік вершаў “Рэха дому”. З шыкоўнымі ілюстрацыямі ад Аляксандры Канафальскай. Ці час сёння на ўзнёсласць і паэзію і чым адметны гэты зборнік? Як захаваць цікавасць да беларускай літаратуры ў эміграцыі? Якім чынам сёння можна дамагчыся прыцягнення ўвагі беларусаў да сваёй культуры і гісторыі? На гэтыя ды іншыя пытанні ў эфіры Еўрарадыё адказвае паэтэса, спявачка, вядоўца, журналістка, заснавальніца Школы традыцыйнага строю Кацярына Ваданосава

Новае сацыялагічнае апытанне паказала небывалы ўзлёт патрыятызму ў беларусах. 87% задаволеныя сітуацыяй у краіне, а 74% аддаюць перавагу захаванню статус-кво. Вось толькі адказваць на пытанні, якія задавалі сацыёлагі, пагадзіўся толькі кожны 14-ы беларус... Абмяркуем гэта з блогерам Аляксандрам Кныровічам. Таксама пагаворым пра новую цацку Лукашэнкі — Нежынскі горна-ўзбагачальны камбінат. Падобна да таго, што чарговая "геніяльная ідэя" падчас рэалізацыі аказалася не такой ужо і геніяльнай. Ды і ўвогуле, нарады, якія Лукашэнка праводзіць "на вытворчасці", выглядаюць усё больш абсурдна: "Няхай мазгамі паварушаць і нешта вырабяць".

Беларусь у планах ЗША, шостая гадавіна смерці Рамана Бандарэнкі і візіт скандальнага пастара ў Мінск — Еўразум за 12 лістапада | Новости Беларуси за 12 ноября by Euroradio

“Мэта адна — шляхі яе дасягнення крыху розныя”, — кажуць прадстаўнікі розных стратэгій па вызваленні палітвязняў і дасягненні змен у Беларусі. Вось толькі гэта ніякім чынам не спыняе спрэчкі паміж прыхільнікамі і падпісантамі “Ліста палітвязняў” і яго крытыкамі. Ці, як выказаўся блогер Кныровіч, тымі, хто сваімі заявамі і скепсісам “маргіналізуе” падпісантаў “Ліста”. Усё гэта на фоне “крыжовага паходу” за аб’яднанне ўсіх (па загадзя імі складзеных спісах) у Аб’яднаны штаб дэмсіл, якое распачала яшчэ адна частка дыяспары. Ці сапраўды пазіцыі прыхільнікаў і крытыкаў “Ліста палітвязняў” моцна адрозніваюцца і хто каго маргіналізуе? Ці ёсць прыкметы таго, што прагноз Касцюговай пра змяншэнне ўзроўню рэпрэсій пачынае спраўджвацца? Якім чынам сёння можна дамагчыся паразумення і аб’яднання дэмсіл і дыяспары агулам — якой палітычнай камунікацыі нам не хапае? На гэтыя ды іншыя пытанні ў эфіры Еўрарадыё адказвае экспертка па палітычнай камунікацыі Настасся Касцюгова

Пройгрыш Трампа і яго партыі на прамежкавых выбарах паставіў пад сумнеў будучыню і самога “перамоўнага трэка” паміж ЗША і Лукашэнкам, і, адпаведна, далейшага вызвалення палітвязняў. Рэдкія аптымісты сярод экспертаў выказваюцца на карысць таго, што праца Коўла ніяк ад унутраных палітычных праблем ЗША не залежыць. Тым не менш тое, што Коўл, насуперак абяцанням, усё ніяк да Мінска не даедзе, а ЕС не спяшаецца далучыцца да перамоў з Лукашэнкам, прымушае задумацца. Ці сапраўды знешняя палітыка ЗША сёння моцна залежыць ад палітыкі ўнутранай і ад незадаволенасці амерыканцаў коштамі на дызель? Калі сапраўды стане зразумела, ці “замарожаны” перамоўны трэк Вашынгтона з Мінскам? Ці пагодзіцца Еўропа перахапіць у ЗША сцяг “гуманітарных перамоў” з Мінскам? На гэтыя ды іншыя пытанні ў эфіры Еўрарадыё адказвае амерыканіст, палітычны аглядальнік Антон Пянькоўскі

Калі вы думаеце, што за мяжой у беларусаў толькі дзве магчымасці для навучання — ЕГУ ў Вільні і “Праграма Каліноўскага” ў Польшчы, — то вы моцна памыляецеся. І гаворка не толькі пра Вольны Беларускі Ўніверсітэт, заснаваны Аляксандрам Мілінкевічам. Ёсць яшчэ Усходнееўрапейская школа палітычных даследаванняў (акурат цяпер праходзіць чарговы набор на навучальныя курсы) ці, да прыкладу, “Кадравы рэзерв”. Гэта там вучаць быць добрымі чыноўнікамі і дзяржслужачымі. Ці апраўдала сябе ідэя “Кадравага рэзерву” і ці карыстаюцца курсы папулярнасцю? Калі атрыманыя веды можна будзе скарыстаць на практыцы — у дзяржструктурах Новай Беларусі? Чаму да структур дэмсіл сёння ў беларусаў мала даверу і ці не час іх рэарганізаваць? На гэтыя ды іншыя пытанні ў эфіры Еўрарадыё адказвае прадстаўнік Аб’яднанага пераходнага кабінета, каардынатар праграмы “Кадравы рэзерв для Новай Беларусі” Юрась Губарэвіч

У Беларусі пад “ліквідацыю” патрапілі рэспубліканскія аб’яднанні бахаі і мусульман. Працягваецца ліквідацыя абшчын хрысціян поўнага Евангелля, а ў каталікоў Беларусі не хапае святароў у прыходах. У той жа самы час лукашэнкаўскія чыноўнікі вітаюць у складзе нямецкай дэлегацыі, якая нечакана прыехала ў Мінск, пастара, які апраўдваў прыход Гітлера да ўлады і акупацыйную вайну Расіі супраць Украіны. А ў паралельным сусвеце еўрапейскіх чыноўнікаў і палітыкаў ідуць размовы пра паляпшэнне палітычнай сітуацыі ўнутры Беларусі… Чаму рэжым працягвае ліквідаваць рэлігійныя супольнасці нават пры іх лаяльным стаўленні да яго? Як успрымаецца візіт у Мінск нямецкага пратэстанцкага святара Готфрыда Шпіта? Чаму пытанне пошуку шляхоў вызвалення палітвязняў не аб’яднала, а яшчэ больш пасварыла беларускае грамадства? Пра гэта і шмат што іншае мы і разважаем у жывым эфіры Еўрарадыё з тэалагіняй, эксперткай у галіне рэлігіі, палітыкі і абароны правоў Наталляй Васілевіч