
Guiden a Scouten: Chalet fir Treffe vun Neonazie gebraucht
D‘Lëtzebuerger Guiden a Scoute sinn entsat iwwert e Bericht, dee weist, dass Neonazien de Scouten hire Chalet zu Wolz fir en Treffe gebraucht hunn. Flamännesch an hollännesch Medien hunn doriwwer bericht.
D‘Guiden a Scouten haten hire Chalet zu Wolz, am Norde vum Land, un extern Persoune gelount. D‘Journalisten hate Kameraen am Bësch beim Chalet verstoppt. Si hunn dunn eng Reunioun vun Neonazie gefilmt. Do gesäit een eng 20 Leit, déi ronderëm e Feier stinn. Si ruffen Nazi-Parolen a si verbrenne Bicher vu jiddeschen Auteuren.
D‘Lëtzebuerger Guiden a Scouten huet eng Plainte bei der Police vu Wolz gemaach. Si soen, si wieren aus de Medien iwwert dat Neonazi Treffe gewuer ginn. Si betounen: Si géife fir demokratesch Wäerter, wéi Toleranz a géigesäitege Respekt stoen, a si géife sech ganz kloer vun der Neonazi Ideologie distanzéieren.
OKAJU: Vill Kanner spiere sech net sécher zu Lëtzebuerg
Ee Véierel vun de Kanner hei zu Lëtzebuerg fille sech net a Sécherheet. An dat virun allem an der Schoul. Dat steet am neie Rapport vum Ombudsmann fir Kanner a Jugendlecher - kuerz OKAJU.
Eng 1.500 Kanner a Jugendlecher ware fir dës Rapport gefrot ginn, wéi si sech spieren, a wat hinne besonnesch vill Suerge mécht. E Véierel vun hinne soten, dass si sech an der Schoul net ëmmer sécher spieren, virun allem wéinst dem Problem vum Mobbing. En nationale Plang géint de Mobbing gëtt den Ament ausgeschafft.
Haaptstad: Keng Steier op eidele Wunnengen
An der Haaptstad vu Lëtzebuerg gëtt bis op Weideres keng Steier op eidele Wunnengen a Bauterrainen ageféiert. Am Stater Gemengerot hunn d‘Majoritéitsparteien DP an CSV, an d‘Oppositiounspartei ADR, géint eng sougenannte „Leerstandsteier“ gestëmmt. Als Grond hu si juristesch Bedenke genannt.
An där zweetgréisster Stad vum Land, zu Esch-Uelzecht, gouf rezent eng Steier op eidele Wunnengen an Terrainen ageféiert. Dat soll hëllefen, dass méi Wunnengen an Terrainen disponibel ginn.
Wéi vill Wunnengen zu Lëtzebuerg eidel stinn ass den Ament net kloer. Et gëtt keen nationale Wunnengsregëster.
Więcej odcinków z kanału "D'Neiegkeeten"



Nie przegap odcinka z kanału “D'Neiegkeeten”! Subskrybuj bezpłatnie w aplikacji GetPodcast.








