Nuntii Latini

Epicus Furor Diē Saturnī, quī undecimus diēs nōnī mēnsis secundum rātiōnem Mahometānōrum fuit, Ali Khamēnī, tyrannus Irāniānōrum, aliīque ēiusdem regiminis magistrātūs et dūcēs in ūnum locum convōcātī, sunt āb Isrāēlītīs et Americānīs, quī scīvērunt ubi Irāniānī essent et quid agerent, subitō interfectī, ac castra et missilia et arma in Irāniā condita sunt oppugnāta.  Quō factō Irāniānī mīlitēs, ultimīs mandātīs ante impetum datīs pārentēs, missilia nōn sōlum in Israelītās iēcērunt sed etiam in Baharīnam, et in Coniunctōs Phylarchōs Arabicōs, et in Cuvaitō, et in Iordaniam, et in Ōmānam, et in Quatariam, et in Arabiam Saudōrum, et in Sȳriam, necnōn etiam in Cyprum īnsulam Eurōpaeam; unde ferē tōta regiō Arabica est rārā concordiā in īram conjuncta adversus Irāniānōs.   Regimen autem Irāniānum fōns et orīgō fuit terrōris; et Hezbollah conjūrātōs terrōristās in Libanō, Hamās inter Palaestīnōs, Houthiānōs in Iemeniā aluit ut gentēs vīcīnās convelleret; necnōn Venetiolānōs aluit, ut vexāret Americānōs, quōs Khamēnī “magnum Satān” vocitāre solēbat.  Domī autem idem regimen innumerābīlia mīlia cīvium trucidāvit et lībertātem repressit.  Khamēnī tamen interfectō, iuvenēs in viīs exsultant et monumenta tyrannī evertunt.  Hortātur praeses Americānus ut Iraniānī cīvēs in oppressōrēs insurgant et regimen tyrannicum ēvertant. Ursula von der Leyen, praeses Europaeae Commissiōnis, diē Saturnī nūntiāvit suum Collegium Secūritātis diē Lūnae convōcandum.  Keir autem Starmer, quī ministrī prīmāriī mūnere adhūc fungitur in Britanniā, brevem ōrātiunculam habuit, quā negāvit Britannōs quicquam ēgisse.  Ante impetūs factōs, Starmer recūsāverat nē permitteret Americānīs ūtī castrīs Britannōrum, ut in īnsulīs Chagōs dictīs; sed cum Irāniānī coepissent missilia in omnēs gentēs fīnitimās et ad mīlitēs Britannōs sine discrīmine iactāre, Starmer aliter cēnsuit, ut licēret Americānīs ūtī castrīs. Bellum in Afghāniā Magsitrātūs Afghānī, quī et Talibānī appellāntur, diē Iovis subitō coepērunt bellum in Pacistānōs gerere longē melius exercitātōs atque armātōs.  Illī igitur invicem bellum apertum gerunt in Talibānōs et impetūs aēriōs tam Cabūrae, in capite Afghāniae, quam in Candahāriam regiōnem, sēdem Talibānōrum, fēcērunt. Bellum in Libanō Quamquam indutiae in Libanō factae sunt, Isrāēlītae impetūs aēriōs in terroristās Hezbollah dictōs faciunt, in quibus praecipuē dūcēs missilibus praefectī occīduntur.  Grex ille Hezbollah dictus ab Īraniānīs alitur, sed longē dēbilior est nunc quam priōribus annīs fuit.  Nawaf Salam minister prīmārius Lībanus dīxit Hezbollah ā mīlitibus Lībanīs interdictum irī. Bellum in Ūcrāīnā Nicolāō Madūrō inter hōrās sublātō, et Khamēnī inter prīmum impetum interfectō, Russī quīntum iam annum bellum, quod putāverant intrā trēs diēs ad fīnem perducendum, in Ūcrāīnēnsēs gerere pergunt.  Diē autem Saturnī subitō atque ex inopinātō Cyrillus Budanov nūntiāvit Russōs nōn iam nōlle pignora secūritātis accipere quae Americānī prōposuissent. Operātiō in Aequitōriā Diē Martis Americānī nūntiāvērunt sē cum Aequitōriānīs coniunctōs in narcoterroristās facere impetum.  Diē autem Mercuriī magistrātūs Aequitōriānī lēgātōs omnēs Cubānōs declārāvērunt persōnās nōn grātās et iussit ante diem Veneris ē fīnibus Aequitōriae ēgredī.

Prīncipēs probātī atque improbātī Novo annō ineunte, doctī hominēs populāris opīniōnis metiendī perītī referunt quī summī magistrātūs ā suīs cīvibus probentur et quī improbentur.  Sōlī, quī ā māiōre parte suōrum probantur, sunt Narendra Mōdī Indus, Sanāē Takaīchī Iāpō, Lee Jae-Myung Corēānus Merīdiōnālis, et Javier Milei Argentīnus.  Ā duābus quīntīs partibus suōrum probantur Donaldus Trump Americānus, Lula da Silva Brasiliānus, Geōrgia Melōnī Ītala.  Nōn nisi ā tertiā parte suōrum probantur Frederīcus Merz Germānus, Recep Tayyip Erdogan Turca, Petrus Sanchez Hispānus.  Maximē autem omnium improbantur Keir Starmer Britannus et Emmanuēl Macron Gallus. Glīscit rēs Americāna Ab Iūliō mēnse usque per Septembrem annōna tōtīus reīpūblicae quattuor partibus centēsimīs crēvit, quod incrēmentum tam cīvium spem quam doctōrum hominum exspectātiōnem superāvit.  Scelera adeō pauciōra quam priōre annō patrantur, ut numerus raedārum hōc annō sublātārum quartā parte sit dēminūtus, et quīntā parte numerus dēminūtus sit interfectōrum.  Pretia sortium in forō bursālī altiōra stant quam umquam anteā. Nigeria Diē Nātīvitātis, praeses Americānus nuntiāvit sē fēlīcem diem nātālem Christī Mahometānīs terrōristīs exoptāre, quī in Nigeriā stragem Christiānōrum fēcissent; nam eōdem diē, paulō ante praesidis nūntium, mīlitēs Americānī stragem eōrundem terrōristārum fēcerant.  Petrus autem Hegseth, Americānus minister bellī, grātiās ēgit Nigeriānīs magistrātibus, quī permīsissent ut impetus fīeret.  Ex eō tempore pergunt Nigeriānī contrā terroristās Mahometānōs pugnāre. Venetiola Tertiō diē mēnsis Iānuāriī, Nīcolāus Madūrō, illēgitimus tyrannus quī rempūblicam Venetiolānōrum ēverserat et cum Irāniānīs aliīsque mōliēbātur rempūblicam Americānam subvertere, in dīciōnem Americānōrum redactus est, ut reus fīeret.  Incursiō, quā mīlitēs Americānī tyrannum cēpērunt, intrā paucās hōrās est absolūta, et omnēs Americānī reductī sunt integrī et incolumēs, quamquam triginta et duo Cūbānī, satellitēs tyrannī, sunt interfectī.  Michāēl Diaz-Canel, quī hāc hebdomade tyrannus pergit esse Cūbānōrum, “Patria aut mors!” clāmāvit, et “Vincēmus.”  Dīxit autem praeses Americānus aliīs novi orbis terrārum dūcibus principibusque cavendum esse, nē id, quod Madūrō accidisset, dēnuō alicui accideret alterī.  Claudiae Scheinbaum, praesidī Mexicānōrum, posteā vīsum est triginta et septem narcoterroristās in dīciōnem Americānōrum reddere, quōs illī petīverant. Ex eō tempore Americānī nautae etiam coepērunt nāvēs petroleāriās capere, quibus interdictum petroleum vehēbātur ut lucrum variīs tyrannīs redderētur.  Unam nāvem, ōlim “Bellam” deinde “Marinēram” nōmine, prope Islandiam Americānī intercēpērunt coram nāve subaquāneā Russicā, quæ tamen Americānīs nōn obstitit.  Quinque nāvēs captae sunt, vidēlicet Skipper, Centuries, Marinera, Sophia, Olina sīve Minerva M. Cūba Praeses Americānus monuit nec petroleum nec pecūniam ā Venetiolā ad tyrannidem in Cūbā īnsulā sustinendam lātum īrī; melius fore Cūbānīs negōtium cum Americānīs agere dē suīs rēbus futūrīs.  Novī enim magistrātūs Ventiolanī nunc cum Americānīs agunt, ut Americānī petroleum Venetiolānum emant, cūius lucrum ad Venetiolam restaurandam nōn sine moderātiōne Americānā ērogētur.  Cūbāna autem dominātiō, quae sexāginta sex annōs populum nōn solum suum opprimit sed etiam Ventiolānum oppressit, et quae strenuē mōlītur rempūblicam Americānam subvertere, nihil petroleī accipiet. Sȳria Hōc mēnse Americānī ūndecimum impetum in Chalifātum Islāmicum lēge tāliōnis fēcērunt, postquam priōre mēnse trēs Ameriānī sunt ab ūnō terroristā interfectī.  Petrus Hegseth, minister bellī, “Numquam,” inquit, “oblīvīscēmur, neque īra nostra umquam resīdet.”  Magistrātūs Syriānī, quī in hāc rē cum Americānīs stant, quinque terroristās comprehendērunt. Vietnamia Tō Lam, secretārius generālis factiōnis quae communista verbōtenus dīcitur et summus magistrātus Vietnamiēnsium, quinque annōs perget clavum reī pūblicae tractāre.  Lam, quī abhinc duōbus annīs coepit magistrātum exercēre, negōtiātōrēs mercātōrēsque, id est prīvātam prōvinciam reī oeconomicae, adeō fovet dum pūblica ministeria restringit, ut Vietnamia magnōpere dītēscat. Iāpōnia Sanāē Takaīchī, ministra prīmāria Iāpōnum, īnferiōrem cameram senātōriam hodiē dissolvit et comitia octāvō diē mēnsis Februāriī habenda indīxit.  Quō audītō senātōrēs “Banzae” ex mōre clāmāvērunt.  Takaīchī, prīma fēmina dux facta Iāpōnum, ā septēnīs ē dēnīs cīvibus laudātur, itaque spērat fore ut possit comitiīs habendīs factiōnis suae auctōritātem rōborāre. Ītalia In Ītaliā pūblicī accūsātōrēs nūntiāvērunt Batāvōrum auxiliō novem hominēs esse comprehēnsōs, quī videntur stipem hūmānitātis causā collectam potius in ūsum terroristārum dēstinasse.  Feruntur enim sub falsīs caritātis nōminibus octōgiēs centēna mīlia dollarōrum terroristīs dedisse Hamas dictīs. Hispānia Intrā septem diēs quattuor trāminibus ferroviāriīs in Hispāniā variae calamitātēs accidērunt.  Quadraginta et trēs hominēs sunt interfectī.

Vīs vīridis in caeruleōs illāta Diē Mercuriī prope Domum Albam Rahmanullah Lakanwal, vir Afghānus ūndētrīginta annōs nātus qūi Bellinghamiae in Vasintōniā cīvitāte habitābat, in duōs mīlitēs Americānōs impetum fēcit, quōrum alter, Andrēas Wolfe nōmine, vulnerātus est, altera, Sarah Beckstrom, interfecta.  Lakanwal, quī illud “Allāhu acbar” exclāmāvit, vidētur impetum fēcisse terrōris prōmōvendī causā.  Tertius mīlēs, custōdibus praefectus quī nōn procul erat sed brevī tantum pugiōne armātus erat, cohibuit quōminus Lakanwal aliōs vulnerāret.  Quibus factīs praeses Americānōrum ferōciter prōpōnit, nē cui aliēnigenae liceat ē terrīs tertiī orbis in Americam immigrāre, atque ut illī, quī iam immigrāverint sed domesticam tranquilitātem ēvertere velint, expellantur; porrō ut subsidia beneficiaque aliēnīs concessa abrogentur.  Ministerium rēbus externīs praepositum nūntiāvit nēminem Afghānum in fīnēs Americānōs receptum īrī. Dē rē Venetiolānā Magistrātūs Americānī referuntur esse parātī nova in illēgitimum tyrannum Venetiolānōrum temptāre, quōrum tamen nec tempus nec magnitūdō nūntiātur.  Monētur tamen nē quod āeroplānum Venetiolam trānsvolet, quārē societātēs āeriae ā commeātū super terram Venetiolānōrum nunc abstinent.  Diē Lūnae magistrātūs Americānī terrōristārum nōmine dēsignāvērunt cōniūrātōs latrōnēs, quī “syndicātum sōlis” vocitantur et cūius caput, Nicolāus Madūrō illēgitimus tyrannus, negat sē ēius caput esse.  Etiam in Venetiolā terroristae quī sub nōmine Hezbollah coniūrātī sunt commerciō venēnī intersunt, quia tyrannus Venetiolānus foedus fēcit cum Irāniānīs, strenuīs auctōribus fautōribusque terrōris.  Nunc autem magistrātūs Americānī et Qatarēnsēs Nīcolāum Madūrō hortantur ut tyrannidem dēpōnat et in luxuriōsum exilium, fortasse in Qatar, fūgiat. Tehrānum aquā carēns Praeses Irāniānōrum dīxit, tam ob nimium numerum incolārum quam quia aqua dēficeret, oportēre sēdem reīpūblicae Irāniānōrum tranferrī.  Nam Tehrānum, caput Irāniānōrum, aquā adeō caret, ut etiam ante hiemem possit dērelinquī et dēsōlārī.  Quindeciēns centēna mīlia hominum Tehrānī habitant, ubi magistrātūs, quippe quī terrōrem in aliēnīs terrīs prōmōvēre quam suōs cīvēs domī tuērī mālint, copiam aquae cīvibus suppeditandam neglegunt. Portōria dēminūta Praeses Americānus ēdīxit portōria, quae in carnem būbulam, caffēam, theobrōma ē Brasiliā in Americam importanda imposita erant, dēminuenda, id quod etiam dē aliīs cibīs importandīs fēcit, nē pretia nimis augērentur.  Nam ē Brasiliā importātur tertia pars omnis caffēae, quam hauriunt Americānī.  Pretium petroleī nunc valdē dēminuitur, ut minōra etiam erant pretia cibī, quem Americānī mēnse Novembre inter sollemnem supplicātiōnem cōnsumpsērunt.   Pecūnia puerīs Americānīs dēstināta Ā praeside Americānō nova condita est ratiō, quā singulīs īnfantibus dābitur mille nummōrum in forō bursālī collocandum.  Licēbit autem parentibus aliīsque cognātīs quīna mīlia singulīs annīs contribuere, ut pecūnia collocāta mīrum in modum cum dēcursū temporis crēscat, donec īnfans ad adultam aetātem perveniat.  Ūnusquisque igitur cīvis Americānus pecūlium habēbit, quō vel studia acadēmica suscipiat vel domum sibi comparet liberīsque augeātur, vel ad alia māiora et futūra pecūniam sibi cōnservet. Somalia Centum ēlectī mīlitēs Americānī helicopterīs vectī et ducentī Puntlandiānī impetum fēcērunt in specūs montium Cal Miskaad dictōrum.  Post quattuor hōrās nōn sōlum Syrī, Turcae, Aethiopēs inter terroristās interfectī sunt sed etiam Abdul Qadir Mumin, dux Calīphātūs Islamicī, occīsus esse putātur.  Omnēs Americānī mīlitēs integrī incolumēsque sunt reductī.  Puntlandiānī autem sperant ante fīnem annī omnēs terroristās ē suā terrā exterminātum īrī. Incertus stātus Guinēae Bissaviēnsis Suffrāgiīs populāribus in Guinēā Bissaviēnsī lātīs, mīlitēs subitō nūntiāvērunt sē summam potestātem cēpisse et rem pūblicam ēversisse.  Quō factō, Ousmān Sōncō, minister prīmārius Senegālēnsium, negāvit Guinēam Bissaviēnsem esse ēversam, et hortātus est ut suffrāgia populāria numerārentur.  Nihilōminus Horta Inta-A Na Man dux ā mīlitibus acclāmātus est ad tempus praeses Guinēānōrum Bissaviēnsium, quī suōs cīvēs ā narcoterroristīs defenderet, et Umārō Sissocō Embalō, prior praesēs, Brazzapolim Congēnsium cōnfūgit.  Guinēa autem Bissaviēnsis malam inter gentēs fāmam habet, quod per ēius portūs ex Americā merīdionālī in Eurōpam magna vīs cocaīnī trānsfertur. Corruptiō Ūcrāīnēnsis Andrēās Iermak, cōnsiliārius Volodomīrī Zelensky praesidis Ūcrāīnēnsium, mūnere abdīcāvit, cum domus sua excussa esset ā magistrātibus, quī quaestiōnem habērent in corruptōs.  Zelensky nuper suōs ministrōs energīae et iūstitiae praepositōs dīmīserat, et ēius socius Timur Mindich putātur in Isrāēl fūgisse.

Perfidī diurnāriī Britannicī Tīmotheus Davie, director generālis Britannicae Societātis Divulgātiōnī, quae saepius litterīs compendiāriīs BBC vocitātur, et Deborah Turness, ēius sociētātis diurnāriīs praefecta, coāctī sunt mūneribus abdicāre, cum alia societas diurnāriōrum, quae Tēlegraphēma dīcitur, dēmonstrāvisset diurnāriōs Britannicae Societātis Divulgātiōnī ōrātiōnem praesidis Americānī partibus omissīs aliīsque falsē coniunctīs consultō et cōnsciōs dētorsisse, ut ille contrārium suae ōrātiōnis dixisse vidērētur.   Nāvēs prope Americam Merīdiōnālem Britannī diē Martis inhibuērunt quōminus suī speculātōrēs Americānīs auxilium darent, cum ipsī coepissent timēre nē Americānī, quippe quī iam ad octōginta narcotromocratās et mercātōrēs venēnī indemnātōs per mare Caribbicum interfēcissent, iūs gentium violārent. Eōdem diē ad mare Caribbicum advēnit duodecima Americāna classis, Thomā Moninger thalassiarchō, cūius praetōria et āeroplānigera nāvis, Geraldus Ford nōmine, est omnium longārum nāvium maxima.  Adsunt etiam secundus exercitus classicōrum, Calvertō Worth imperātōre, cūius nāvis praetōria et helicopterigera appellātur Īwō Jīma; necnōn aliae longae nāvēs missilibus refertae atque etiam nāvēs subaquāneae.  Tot et tantīs copiīs convocātīs, quoniam Venetiolānus tyrannus illēgitimus illēgitimō commerciō venēnī lucrātur quō cīvēs Americānī necantur, iūs gentium longē vehementius violārī potest.   Magistrātūs Americānī quingentiēns centēna mīlia nummōrum prōmittunt eī, quīcumque Nīcolāum Madūrō tyrannum Venetiolānōrum in dīciōnem reddiderit Americānam. Starmer nōn labefactus Keir Starmer, minister prīmārius Britannōrum quī favōre populī vix fruitur, nēgāvit sē rūmōribus labefactum esse, neque sē in suōs ministrōs neque illōs in sē coniūrāre. Rēspūblica solitō mōre administrātur Senātōrēs factiōnis sinistrae sīve Dēmocraticae, quī quadrāginta diēs recūsāverant nē pecūniam magistrātibus ērogārent ad rempūblicam gerendam, cum nihil quod sperāverant efficere posse vidērentur, manūs tandem dedērunt.  Itaque satis pecūniae ērogātur ut magistrātūs rempūblicam diēs gerant septuāginta.  Quod comitia populāria ad senātōrēs ēligendōs annō proximō habēbuntur, fierī vix posse vidētur quōminus tālēs rixae iterum iterumque incommoda dītiōribus commeātū āeriō interdictīs et prōlētāriīs congiāriō prīvātīs miseriās afferant. al-Sharā in Americā Ahmed al-Sharā, quī ōlim al-Jolānī vocitābātur, praeses Sȳrōrum, Vasintōniam urbem vīsitāvit diē Lūnae, ubi cum praeside Americānō collocūtus est dē lēge Caesariānā abrogandā.  Nam illa lex, quae commercium inter Americānōs et Bashar Assad tyrannum Sȳrōrum interdīxerat, eōdem tyrannō in exilium expulsō nunc obstat, nē post bellum cīvīle Sȳrōrum rēs renoventur. Terror in Indiā Pakistaniāque In capitibus tam Indiae quam Pakistaniae gemina pyrobola dīrupta sunt, quibus ad vigintī hominēs sunt interfectī.  Pax tamen, quam mēnse Māiō praeses Americānus utrīque gentī suāsit, manet, dum quaestiō in auctōrēs terrōris habētur. Ūcrāīnēnsēs pecūniā corruptī Cum quaestiō dē pecūlātiōne corruptiōneque in Ūcrāīnā habērētur, ministrī tam iūstitiae quam energīae præfectī honōribus officiīsque sē abdīcāvērunt, ut quī coniūrātī referrentur in pecūlātiōnem.  Timur Mindich, amīcus praesidis Ūcrāīnēnsium, quī fōns et princeps coniūrātiōnis esse putātur, fūgit.  Mīliēns centēna mīlia nummōrum sublāta esse feruntur. Comitia in Chiliā habenda Diē Sōlis Chiliēnsēs populāria suffrāgia ferent.  Doctī hominēs quī populārem ōpīniōnem metiuntur referunt scelera, mīgrātiōnem, gregēs coniūrātōrum latrōnum animōs cīvium magis occupāre quam rem oeconomicam, salūtem pūblicam, īnstitūtiōnem puerōrum.  Quamquam Chilēnsēs inter tūtissimās gentēs merīdiōnālis Americae manent, numerus tamen hominum ā percussōribus occīsōrum inter decennium est bis auctus.  Quod nōn sēiungitur ab auctō numerō Venetiolānōrum, quī in Chiliēnsium fīnēs ingressī sunt, unde fit ut Chilēnsēs nōmen “Trāminis Arāguae” audīre coeperint. Sinēnsēs Iāpōnēs reprobant Sanaē Takaīchī coram senātū Iāpōnum dīxit sibi necesse vidērī respondēre, sī Formōsa īnsula, quae suī iūris est, ā Sinēnsibus oppugnārētur.  Quod Sīnēnsibus, utpote quī Formōsam īnsulam, quae suī iūris est, in suā dīciōne esse falsē dīcerent, offēnsiōnem praebuit.  Negāvit autem Takaīchī ab oppositō senātōre diē Lūnae rogāta sē posse nunc negāre Iāpōnēs arma atomica invēntūrōs, factūrōs, habitūrōs.  Sola enim est terra Iāpōnica, in quam arma atomica adhibita erant, unde diū negābātur nē Iāpōnēs arma atomica possidērent.

Rēspūblica cōnsistit Cum factiōsī senātōrēs nōlint inter sē cōnsentīre dē pecūniā ad rempūblicam gerendam ērogandā, magistrātūs et grapheiocratēs et variī administrī pūblicī pergunt auctōritāte opibusque carēre, quibus mūneribus pūblicīs fungantur.  Congiāria, quibus prōlētāriī aluntur, et quōrum sumptus annīs recentiōribus mīrum in modum augētur, nōndum habentur, unde pauperēs querī coepērunt.  Dītiōrēs autem incommoda habent in itineribus volandō faciendīs, cum rectōrēs āeriī dēficiant commeātūs.  Quamquam nōn rārō fit hōc saeculō ut līs inter senātōrēs prohibeat, nē rēspūblica solitō mōre gerātur, hōc autem annō diūtius quam umquam anteā mūnera pūblica intermittuntur. Plūrēs nāvēs dēmersae Nautae Americānī pergunt nāvēs, quae feruntur venēnō illicitō refertae esse, in utrōque marī prope Venetiolam et Columbiam mergere.  Hāc hebdomade trēs in marī Caribbicō, duo in marī Pacificō, interfectī sunt.  Americānī asserunt sibi licēre mercātōrēs venēnī, quōs narcotromocratēs sīve narcoterroristās vocant, indemnātōs occīdere, neque utrum iūre an iniūriā magnī facere videantur. Venetiolānī Columbiānīque vērō dīcunt piscātōrēs cēlōcibus piscātuī ineptissimīs instructōs et mediā nocte itinera clam facientēs esse contrā iūs et nullīs indiciīs illicitī commerciī divulgātīs inūriā occīsōs. Trāmen Araguae in Hispaniā Matrītī diē Veneris custōdēs pūblicī nūntiāvērunt sē trēdecem hominēs comprehendisse, quōs dīcunt coniūrātōs esse sub nōmine Trāminis Araguae.  Quae societas latrōnum ab Americānīs accūsātur terrōris per orbem terrārum prōmovendī, sed ab Venetiolānīs, unde societas orīginem traxit, negātur exsistere.  Matrītēnsēs ūnā cum Venetiolānōs cēpērunt etiam varia venēna illicita, inter quae fuit “tūsī” sīve cōcaīnum roseum, quō insigne est Trāmen Araguae. Commercium cum mediā Asiā Praeses Americānus praesidēs quinque gentium mediae Asiae, vidēlicet Cazachōrum, Cyrgessōrum, Tadzikōrum, Turcomannōrum, Uzbecōrum, Vasintōniae convēnit, ubi collocūtī sunt dē commerciō metallōrum augendō.  Cassym-Jomart Tokāyev, praeses Cazachōrum, conventum ipsum laudāvit ut initium novae aetātis, quā America et media Asia ūnā florēret; Shavkat autem Mirziyōyev, praeses Uzbecōrum, laudāvit potius praesidem Americānum ut praesidem tōtīus orbis terrārum.  Quae gentēs cum Russīs sociātae parum prosperant. Sheinbaum persōna nōn grāta in Perūviā Senātōrēs Perūviānī cēnsuērunt Claudiam Sheinbaum, praesidem Mexicānōrum, persōnam nōn grātam dīcendam.  Nam Mexicānī iūs asȳlī dedērunt Elizabēthae Chavez, ōlim ministrae prīmāriae Perūviānōrum, postquam etiam in suōs fīnēs accēperant uxōrem filiōsque Petrī Castillo, ōlim praesidis, quī nunc pūblicīs vinculīs tenētur.  Perūviānīs enim mōris est pristinōs magistrātūs in carcerem condere. Sudānia In Sudāniā, ubi bellum cīvīle inter magistrātūs et latrōnēs quī sē Rapida Auxilia appellant, utraque pars indūtiās, quās Americānī hūmānitātis causā prōposuērunt, cōnsentiunt esse observandās.  Rapida enim Auxilia nuper al-Fashir urbem cēpērunt, quae ultima in Darfur prōvinciā dictō magistrātibus audiēbat. Geōrgia In Geōrgiā reī factī sunt octō hominēs in rē pūblicā versātī, quī magistrātibus oppōnuntur et in quōrum numerō etiam Michaēl Saakashvilī, ōlim praeses, habētur, crīmine ēversiōnis reī pūblicae affectātae.  Magistrātuum factiō in Russōs prōniorem sē praebet quam in Ūniōnem Eurōpaeam. Ēlōn Musk dītescit Cōnsortēs societātis Tesla dictae maximam in memoriā hominum mercēdem approbāvērunt Ēlōnī Musk solvendam, quī intrā decennium deciēns mīliēns mīliēns centēna mīlia nummōrum accipiet.

Hī sunt Nūntiī Latīnī Vasintōniēnsēs, quī in Occidentālī studiōrum Ūniversitāte Vasintōniēnsī collectī sunt ac recitantur. Hodiē est vīcēsimus quartus diēs mēnsis Octōbris.  Hāc hebdomade, minister prīmārius Gallōrum est Sebastiānus Lecornū. Museum Lupārēnse Diē Satūrnī, nōn noctū sed sōle ortō, trēs vel quattuor fūrēs scalīs in museī Lupārēnsis aulam Apollinis per fenestram ingressī gazam reīpūblicae Gallōrum surripuērunt et automatāriīs birotīs impūnēs ēvāsērunt.  Ē rēbus surreptīs, fūrēs putantur ūnam cāsū perdidisse, cum diadēma Eugeniae uxōris Neapoliōnis imperātōris extra museum repertum sit humī iacēns et frāctum. Nāvēs mersae Pergunt nautae Americānī nāvēs venēnō ōnerātās mergere, nōn solum in marī Caribbicō sed nunc etiam in marī Pācificō.  Minātur enim praeses Americānus mercātōrēs venēnī marī terrāque interfectum īrī; negat porrō sibi necesse vidērī bellum indīcere, cum in animō habeat extrā ordinem hominēs, quīcumque venēnum in Americam īnferant, occīdere.  Diē Mercuriī Columbiānōrum ministerium rēbus externīs praepositum postulāvit, ut Americānī ā nāvibus mergendīs abstinērent, cuī respondit praeses Americānus auxiliō mīlitārī Columbiānīs tollendō. Carolus et Leō precantur Carolus, ēius nōminis tertius, rex Britannōrum, et Leō, ēius nōminis quartus decimus, pontifex maximus, ūnā precātī sunt in sacellō Sixtīnō.  Carolus enim, quī ipse dīvortium fēcit et novam uxōrem dūxit, suprēmus gubernātor est ecclēsiae Anglicānae, quae ideō ab ecclēsiā Rōmānā discēderat, ut Henrīcō, ēius nōminis octāvō, licēret dīvortium facere et novās uxōrēs dūcere.  Āfuit vērō Sarah Mullally, nova archiepiscopa Cantauriēnsis, quae praeest ecclēsiae Anglicānae.  Carolō porrō futūrīsque rēgibus Britannōrum ā pontifice Rōmānō dāta est sedes in basilicā Sanctī Petrī extra moenia, quae sella inscrībitur, “ut ūnum sint.”  Uterque etiam alterī honōrem decrēvit cōnfrāternitātis. Roderīcus Paz ēlectus Suffrāgiīs populāribus lātīs numerātīsque Roderīcus Paz, moderātus, ēlectus est praeses Boliviānōrum.  Vigintī enim annōs regnāvit in Boliviā factiō socialistārum dum rēs oeconomica pessum ībat.  Paz autem vult Americānōs colere, quōrum lēgātōs Evō Mōrālēs, ōlim praeses, annō bis millēsimō octāvō expulit. Sanaē Takaīchī ministra prīmāria Iāpōnum Sanaē Takaīchī prīma fēmina facta est ministra prīmāria Iāpōnum.  Takaīchī, factiōnī līberālī et populārī praeposita, et cum factiōne rēs nōvās prōmoventī sociāta, fertur velle vestigiīs et Shinzōnis Abē et Margarītae Thatcher ingredī ad rem pūblicam gerendam.  Novum porrō ministerium creāvit, cūius erit cūrāre ut concordia inter cīvēs et aliēnigenās tueātur; cūi praefecta est Kimī Onoda, in Americā nāta. Cammarūnia In Cammarūniā, ubi reclāmātur propter comitia, quae nonnullīs vitiātia videntur, rēte omnium gentium est sublātum.  Paulus enim Bīya, nōnāginta duōs annōs nātus, quī quadrāgintā et trēs annōs regnāvit, octāvum ēlectus est praeses. Praeses Americānus in Āsiā Praeses Americānus proximā hebdomade Malaesiam diē Sōlis, et Iapōniam diē Martis, et Cōrēam Merīdiōnālem diē Iovis visitābit.  In Cōrēā etiam colloquētur cum Xi Jinping, praeside Sīnēnsium.  Dīxit sē prīmum omnium rogātūrum praesidem Sīnēnsium de illicitō fentanylī venēnī commerciō cohibendō. Minister Germānus nōn in Āsiā Iōhannes Wadephul, Germānōrum minister rēbus externīs praepositus, coāctus est iter, quod in Sīnās suceptūrus erat, dēpōnere, ut quem nūllī magistrātūs vellent convenīre.   Vīs atomica in Vasintōniā In Vasintōnia cīvitāte, ubi scientia atomica etiam inter secundum bellum omnium gentium colēbātur, Amāzon societas duodecim parva et modulāria reactōria atomica aedificābit.  Quod novum genus reactōriī putātur longē commōdius, ut quod minimum spatium postulet, et tūtius quam vetustiōra genera quae iam exstant.  Quibus reactōriīs additīs vīs ēlectrica magnīs ordinātrīs, quālibus Amāzon societas ūtitur, suppeditārī potest nullō damnō in nātūram illātō.

Indūtiae Palaestīnae Americānus praeses cūrāvit, ut indūtiae inter Isrāēlītās et latrōnēs Hamas dictōs fīerent.  Latrōnēs igitur omnēs captīvōs Isrāēlītās, quōs obsidēs tenēbant, trādidērunt, et Isrāēlītae nunc ab armīs abstinent.  Cōnsilia igitur pācis iam compōnuntur. Praemium Pācis Nobeliānum Nobeliānum praemium pācis accēpit Marīa Corīna Machādō, cīvis Venetiolāna et dux factiōnis Nīcolāō Madurō tyrannō oppositae.  Dīxit Machādō sē praemium dīcāre et miseriīs populī Venetiolānī et praesidī Americānō, quī causam lībertātis Venetiolānōrum rōborāvisset. Venetiolānus tyrannus queritur Lēgātī Nicolāī Madūrō, tyrannī Venetiōlānōrum, coram Conciliō Secūritātis Omnium Gentium queruntur Americānōs impetūs in nāvēs suōs fēcisse.  Quās nāvēs Americānī referunt plēnās fuisse venēnī et tromocratārum.  Incertum autem est quid Venetiolānī putent sibi prōfutūrum querellās facere coram Conciliō, in cūius sententiās Americānī habent iūs intercessiōnis.  Americānus praeses iam cēnset licēre speculātōribus quāslibet rēs clandestīnās suscipere ad Venetiolānam tyrannidem subvertendam. Magistrātūs Americānī et Russī colloquentur Post longa colloquia tēlephōnica, summī magistrātūs Americānī et Russī intrā duās hebdomadēs dē rē Ūcrāīnēnsī collocūtūrī sunt Budapestinī.  Prīmum ex eō tempore, quō Russī bellum in Ūcrāīnēnsēs mōvērunt, Vladimīrus Pūtin, praeses Russōrum, urbem in Eurōpaeā Ūniōne sitam vīset, ut quem iūdicēs Quaestiōnis Omnium Gentium petant ut crīmine scelerum contrā iūs gentium patrātōrum comprehendātur.  Praeses Ūcrāīnēnsium, nunc in Americā cum praeside Americānō colloquitur. Iōhannēs Bolton reus Iōhannēs Bolton, ōlim cōnsiliārius salūtī reīpūblicae Americānae tuendae praepositus, et strenuus fautor bellī gerendī, coram iūdicibus accūsātur tabulās secrētās iniussū magistrātuum retinendī et cum amīcīs partiendī.   Novissimus minister prīmārius Gallōrum Hāc hebdomade novissimus minister prīmārius Gallōrum est Sebastiānus Lecornū, quī priōre hebdomade minister prīmārius paulisper fuerat antequam magistrātū sē abdicāvit.  Diē Iovis Lecornū dēmonstrāvit sē nondum perdidisse cōnfidentiam omnium senātōrum, sed satis pollēre ut posset in magistrātū diūtius manēre. Zhuravlov Germānīs nōn trāditus Magistrātūs iūdicēsque Pōlōnī recūsant nē Volodomīrum Zhuravlov Germānīs trādant.  Zhuravlov fertur inter clandestīnōs nātātōrēs Ūcrāīnēnsēs numerandus quī petrōleārium ductum “Nordstream” dictum dīrupuērunt.  Iūdicēs enim cēnsent quod iussū patriae esse actum, id nōn crīminī vertendum.  Hispānia Cum Hispānī dīxerint sē nōlle vīcēsimam partem annōnae, quae ab omnibus sociīs Atlanticīs poscitur, solvere ad mīlitiam parandam, rogātur ab sociīs et praecipuē Americānō praeside an Hispānī, quōrum rēs oeconomicae glīscant, dēbeant portōriīs augendīs pūnīrī. Novum ācroāma Certiōrēs factī sumus dē novō ācroāmate, cūius titulus est “Et capit punctum.”  Ibi Montrēgis nūntiōs dē rēbus athlēticis divulgat.  Hortāmur igitur fautōrēs lūdōrum ut auscultent.

Pugna in mercātōrēs venēnī geritur Secundum cartam senātuī diē Iōvis datam, praeses Americānus cēnset rempūblicam contrā mercātōrēs illicitī venēnī pugnāre, quae pugna nōn in aliēnās gentēs sed in latrōnēs gerātur.  Quae verba cautē ēliguntur: nam vērum bellum nōn praesidī sed senātuī licet indīcere.  Praesidis autem iussū trēs vel plūrēs celōcēs, quae feruntur venēnō onerātae esse, ā nautīs Americānīs iam mersae sunt et ad septendecim hominēs Venetiolānī interfectī, quī narcotromocratae sīve latrōnēs tam venēnum quam terrōrem adhibentēs fuisse dīcuntur.  Diē Veneris autem nautae Americānae quartam nāvem dēmersērunt. Ambigitur utrum liceat praesidī imperāre, ut nautae mīlitēsque Americānī aliēnās narcotromocratās interficiant.  Et in hāc ambiguitāte latent īnsidiae: nam doctī hominēs quī sēnsum commūnem metiuntur referunt tālem pugnam in mercātōrēs venēnī gerendam ā plērīsque cīvibus approbārī, unde factiōnī magistrātibus oppositae perīculōsum sit praesidis cōnsilium improbāre.  Terror Mancuniī Mancuniī in Britanniā Jihad Al-Shamie, vir Britannūs triginta et quinque annōs nātus, raedam suam in synagōgam Iūdaeōrum, quī tunc sanctissimum altārum feriārum diem expiātiōnis agēbant, illīsit et veste displōsīvā, ut vidēbātur, indūtus cultrōque armātus coepit hominēs percūtere, donec custōdēs pūblicī manuballistīs armātī fīnem in ēius impetum imposuērunt.  Praeter Al-Shamie duo aliī hominēs interfectī sunt, quōrum ūnus ā custōdibus pūblicīs cāsū occīsus est, et aliī sunt vulnerātī.  Custōdēs pūblicī nunc operam dant, ut causam hūius impetūs intelligant, sed etiam monent tromocratīam patrātam sibi vidērī, id est, impetum factum esse ut terror cīvibus incuterētur; aliōs virōs duōs ūnamque fēminam esse comprehēnsōs, quī tromocratīam parārent. Archiepiscopa Cantuariēnsis Diē Veneris Sarah Mullally, episcopa Londoniēnsis, est ab ecclēsiā Anglicā creāta archiepiscopa Cantauriēnsis.  Ecclēsia Anglica, quae scandalīs quatitur, etiam acriter divīsa est inter factiōnem sinistram, quae in Britanniā pollet, et factiōnem dextram, quae est Africāna et māior.  Inde questus est episcopus Nigeriānus, virum dēbuisse archiepiscopum creārī, cum oportēret fēminās virīs obtemperāre.  Nova ministra prīmāria Iāpōnum Sanae Takaichi diē Saturnī facta est dux maximae factiōnis in rē pūblica Iāpōnum, unde vērīsimile vidētur eam ministram prīmāriam fūtūram Iāpōnum.  Prīma erit fēmina quæ Iāpōnibus praesit.  Dīxit ipsa sē dē victōriā adeptā nōn laetārī, quippe quae potius difficilem labōrem esset susceptūra. Novissimus minister prīmārius Gallōrum Sebastiānus Lecornū creātus est novissimus minister prīmārius Gallōrum, quī et quīntus erit inter biennium, et septimus ex eō tempore quō Emmanuēl Macron ad clavum et gubernācula ascenderat reīpūblicae. Minister prīmārius Gallōrum magistrātū sē abdicāvit Sebastiānus Lecornū, novissimus minister prīmārius Gallōrum, diē Lūnae magistrātū sē abdicāvit. Tabulārium Cōrēānum combustum Tabulārium ēlectronicum “G-Drive” dictum, ubi opera pūblica reīpūblicae Cōrēae Merīdiōnālis conservābantur, exarsit, neque exempla monumentōrum exstant.  Quīnta pars omnium documentōrum, quae ad rempūblicam gerendam facta erant, est dēlēta neque ullō modō reciperārī potest.  Monent igitur magistrātūs, nōn fierī posse ut rātiōnēs expensōrum acceptōrumque senātuī hōc mēnse reddantur.  Diē Iovis magistātus quīdam tabulāriō reficiendō praepositus, cūius nōminis ūna tantum littera “A” diurnāriīs relāta est, sē ex altō praecipitāvit.

Collīsiō Liverpoliī Liverpoliī in Britanniā Paulus Doyle, vir quīnquāginta et trēs annōs nātus, raedam suam in turbam hominum dīrexit, quī pompam in honōrem gregis pedilūsōrum celebrābant.  Incertum est, an Doyle illicitīs medicāmentīs ēbrius fuerit.  Ad octōginta hominēs vulnerātī sunt, quōrum septem in valētūdināriō manent. Percussiō Hamburgī Hamburgī in Germāniā duodēvigintī hominēs vulnerātī sunt ā fēminā ūndēquadrāgintā annōs nāta et cultrō armāta.  Custōdēs pūblicī referunt eam sibi vidērī potius mente captam quam factiōsam vel causā quādam politicā mōtam. Carolus in Canadā Carolus ēius nōminis tertius, rex nōn sōlum Britannōrum sed etiam Canadēnsium, Canadam diē Martis visitāvit, quam rempūblicam dīxit fortem esse ac līberam.  Dīxit porrō mundum perīculōsiōrem et minus certum sibi vidērī quam ullō aliō tempore post secundum bellum omnium gentium.  Prīmus autem est rēx quī post septuagintā annōs inaugurātiōnī senātūs Canadēnsium praesēns praefuerit. Uganda et Germānia Exercitus Ugandae negāvit sē futūrum auxilium mīlitibus Germānīs aut dātūrum aut ab illīs acceptūrum, propter Matthaeum Schauer lēgātum Germānōrum, quem accūsant reī pūblicae subvertendae.  Germānī autem negant sē quidquam vel agere vel ēgisse ad rem pūblicam Ūgandēnsium subvertendam; negant porro suōs mīlitēs esse cum Ūgandēnsibus in ullā rē commūnī coniūnctōs. Trāmen Araguae in Argentīnā cohibitum Patrīcia Bullrich, Argentīnōrum ministra secūritātī pūblicae praefecta, diē Iōvis nūntiāvit duodecim hominēs, quī putantur in grege coniūrātōrum “Trāmine Araguae” dictō sociātōs esse, comprehēnsōs esse suspiciōne latrōciniī.  Dīxit porrō eōs impetūs fēcisse in macella et tabernās fabrōrum, tam sclopīs quam armīs displōsīvīs, quibus nōnnullōs interfēcissent.  Magistrātūs tam Argentīnī quam Americānī existimant Trāmen Araguae cōnārī terrōrem cīvibus incutere; magistrātūs autem Venetiōlānī, unde latrōnēs oriuntur, asseverant coniūrātiōnem annō bis millēsimō vīcēsimō tertiō esse excīsam. Laesae Māiestātis Magistrātūs Siamēnsēs causam laesae māiestātis, cūius crīmine reus erat Paulus Chambers, professor scientiae politicae et cīvis Americānus, dīmīsērunt, postquam Chambers profectus est.  Siamīā enim lēgēs omnium gentium strenuissimās habet, quibus dignitātem regis ēiusque familiae tuentur.  Chambers ipse dīxit sē rēgiam familiam semper magnā cum reverentiā coluisse.  Verba autem, propter quae Chambers reus factus est, neque ab illō scripta sunt, neque in Siamīā sed Singapūrae, neque ad rēgem ipsum attinēbant sed ad factiōnēs tam mīlitum quam custōdum pūblicōrum, quae inter sē rixārentur. Macrōn nōn ab īrātā uxōre caesus Palātium Ēlysium negāvit Emmanuēl Macrōn, praesidem Gallōrum, ab uxōre esse caesum.  Nam, statim postquam iānua aperta erat āeroplānī, in quō stābat Macrōn, in cōnspectū diurnāriōrum subitō uxōris manus apparuit quae faciem praesidis pepulit vel trūsit; quō factō Macrōn, cum diurnāriōs per apertam iānuam animadvertisset, surrīsit et suam manum iactāvit ut diurnāriōs salūtāret.  Deinde, dum Macron et uxor scālīs dē āeroplānō descendunt, uxor recūsāvit nē bracchium ēius tenēret.  Palātium autem, quod prīmum negāvit quidquam factum esse, nunc, cum imāginēs divulgātae sint, negat praesidem caesum esse ab īrātā uxōre, sed coniugēs amantēs inter sē amanter lūsisse.

Captīvus līberātus Richardus Grenell, lēgātus Americānus, nūntiāvit sē Iōsēphum St. Clair, cīvem Americānum quem Venetiolānī vinculīs ā mēnse Novembrī tenuerant, in Americam reduxisse.  Mēnse Iānuāriō Grenell sex aliōs cīvēs redūxerat. Terror in Vasintōniā urbe Ēlīas Rodriguez, vir Sicagēnsis trigintā annōs nātus, reus est homicidiī.  Fertur enim Vasintōniae (in urbe Columbiae prōvinciae) extrā mūsēum Iūdaicum duōs Isrāēlītās, quī in sēde lēgātiōnis muneribus fungī solēbant, occīdisse; quī et, dum comprehendēbātur, identidem clamābat ut Palaestīna līberārētur.  Foederālis Sedes Investīgandō nuntiāvit sē certiōrem factam esse Rodriguez nōnnulla scrīpsisse, quae vidērentur terrōrem in Isrāēlītās prōmōvēre; necnōn participem fuisse gregum quī extrēmīs partibus sinistrīs favērent. Colloquia inter Russōs et Ūcrāīnēnsēs Colloquia prīma, quae post trēs annōs inter magistrātūs Russōrum et Ūcrāīnēnsium habita sunt, post duās hōrās nōn sine fructū sunt ad fīnem perducta.  Cōnsēnsī enim sunt lēgātī mille utrīusque gentis captīvārum līberāre, quae mūtua remissiō erit hūius bellī maxima.  Russī autem magistrātūs dīxērunt colloquia sibi placuisse, sē porro velle pergere cum Ūcrāīnēnsibus dē pāce conciliandā colloquī. Coniūrātī in Ceirum Starmer In Britanniā duo hominēs, Rōmānus Lavynovych Ūcrāīnēnsis et Stanislaus Capiuc Romāniānus in occidentālī Ūcrāīnā nātus, reī sunt cōniūrātiōnis adversum Ceirum Starmer: nam tria incendia fēcērunt in locīs, ubi Ceirus Starmer, minister prīmārius Britannōrum, ōlim habitāverat.  Incertum est, ob quam causam illī incendia fēcerint. Eurovīsiō Basilēae in Cōnfoederātiōne Helveticā, Iōhannēs Pietsch, cantor Austriacus, victōriam tulit certāminis totīus Eurōpae, quod Eurovīsiō dīcitur.  Pietsch, contrātenor altus quī “Amōrem Perditum” cecinit, spērat sē cum Conchīta Wurst, quae annō bis millēsimō quartō decimō palmam rettulit, praefūtūrum proximō certāminī, quod in Austriā habēbitur. Dan victor Comitiīs in Rōmāniā diē Sōlis habitīs, Nicūsor Dan victor ēvāsit.  Geōrgius Simiōn, quī priōribus in comitiīs vidēbātur plūrimum pollēre, Nicūsōrī concessit, postquam falsō nūntiāverat sē victōrem esse.  Magistrātūs autem Gallōrum negant id, quod Pavelus Durov, praefectus societātī Tēlegrammatī dictae, cūius ope hominēs clam atque ēlectronicē colloquuntur, accūsāvit, vidēlicet ā suīs speculātōribus postulātum esse, ut Tēlegramma arcēret hominēs dextrārum partium, quōminus dē rē politicā Rōmāniānōrum colloquerentur.  Sed, cum rumor illīus postulātiōnis ortus esset, Simiōn dīxit sē rogātūrum esse ut iūdicēs, quī priōra comitia abrogāvissent propter rumōrem, quō Russī per TikTok comitia clam aggressī esse putābantur, etiam novissima comitia abrogārent propter similem rumōrem, quō Gallī per Tēlegramma comitia clam aggressī esse putābantur.   Nāvis Cōrēāna statim dēmersa Diē Mercuriī, Chongjin in Cōrēā Boreālī, novissima nāvis bellica, quae in mare dēdūcēbātur, subitō coram multīs necnōn etiam Kim Jong-un ipsō ēversa naufrāgium fēcit.  Kim ipse in nāvālia excanduit: nōn modo calamitātem esse sed crīmen negligentiæ, quæ dignitātem totīus gentis maculāret nec tolerātum īrī.  Iussit porro nāvem, quae nunc mersa iacet, ante mēnsem Iūlium ē marī tollī reficīque. Ἡ ὀρύζα ἐν Ἰαπωνίᾳ ἀνατιμᾶται ἡ τῶν Ἰαπώνων πολιτῶν εὔνοια πρὸς τὸν Σιγηρέα Ἰσίβαν, τὸν τὴν μεγίστην ἐν Ἰαπωνίᾳ ἀρχὴν ἔχοντα, εἰς τὸ ἐλάχιστον κατήχθη, ὥστε ἔννεα μέρη τῶν πολιτῶν πρὸς Ἰσίβαν ἀγανακτοῦσι διὰ τὴν τῆς ὀρύζης ἐπιτίμησιν.  ἡ γὰρ ὀρύζης τιμὴ σχεδὸν διπλασία ἐν τῷ αὐτῷ ἔτει γέγονεν.  ὁ δὲ Τακεὺς Ἠτών, ὁ έπὶ τῇ γεωργίᾳ ἄρχων, μεγαλαυχήσας οὐδέποτε χρῆναι ἑαυτὸν, ὡς πολλὰ δῶρα δεχόμενον, ὀρύζαν πρίασθαι, τῇ μὲν Σελήνης ἡμέρᾳ συνέγνω τὸ τῆς ἀλογίας καὶ ὕβρεως ἁμάρτημα· τῇ δὲ Ἑρμοῦ ἠναγκάσθη τῆς ἀρχῆς ἀφίστασθαι. Κουαουτέμοκ τῇ Βροῦκλιν γεφύρᾳ συνέκρουσεν ἡμέρᾳ Κρόνου ἐν τῷ Νέῳ Ἐβοράκῳ μακρὰ ναῦς τοῦ Μεξικανικοῦ στόλου, Κουαουτέμοκ κεκλημένη, ἐκ τοῦ λιμένος ἀναχωρήσασα, ἐλαυνομένης δυνάμεως ἐκλιπούσης, πολλῷ ῥεύματι παλιμπρυμνηδὸν φερομένη, τῇ γεφύρᾳ τῇ Βροῦκλιν καλουμένῃ συνέκρουσεν.  τῶν ναυτῶν, ὧν πολλοὶ ἐπὶ τῶν κεραιῶν ἵσταντο, ἀπέθανον μὲν δύο, ἐκομίσθησαν δὲ τραυματίαι δύο καὶ εἴκοσιν.  τῆς μὲν νεὼς πάντες οἱ ἱστοὶ κατερράγησαν, ἡ δὲ Βροῦκλιν γεφύρα διὰ τὴν ἰσχὺν ἀβλαβὴς διαμένει.  οἱ οὖν ἄρχοντες τοῦ Νέου Ἐβοράκου ζήτουσιν αἰτίαν τῆς συμφορᾶς. Brennus Legrānus diem obiit Brennus Legrānus, quī et Brian Reynold Bishop Anglicē nōminātus est, Britannus et strenuus fautor Latīnitātis vīvae, diem obiit.  Quī nōn sōlum Latīnae linguae prōmovendae operam dedit sed etiam Volapüka linguae ūniversālis annō millēsimō nōningentēsimō octōgēsimō quartō creātus est septimus praeses, quī cifal eō sermōne vocātur.  Vīxit annōs nōnāgintā et ūnum. Laudēs in Byrōnem Stayskal dicendae Byrōn Stayskal, professor ūtrīusque sermōnis quī saepissimē linguam Graecam nostrā in studiōrum Ūniversitāte docet, hōc annō acadēmicō peractō rude donābitur et in Colōrātam cīvitātem lārēs trānsferet.  Septindecim enim annōs docuit apud Occidentālem studiōrum Ūniversitātem Vasintōniēnsem.  Cūius gravis et melliflua vox nōnnullīs nōta est, quī Nūntiōs Latīnōs Vasintōniēnsēs auscultant.  In quem laudēs dicentur quartā hōrā, secundō diē mēnsis Iūniī, in centēsimō vīcēsimō prīmō conclāvī aedium Milleriānārum.