NASA 逐工一幅天文圖 APOD Taigi

新 ê 恆星 是 ùi 死亡 恆星 ê 殘骸 內底 誕生--ê。銀河系內底有一粒 足大質量 ê 恆星，重力崩塌 死亡了後 ê 氣體殘骸，創出 G296.5+10.0 超新星殘骸。美人魚星雲就是 其中 ê 一部份。美人魚星雲 嘛叫做 泰國鬥魚星雲，是 超新星殘骸 一个特別 ê 亞分類。伊分佈 tī 兩爿，而且伊 ê 形親像是圓--ê。這个雲絲形 ê 星雲上開始是 tī X 光發現--ê，毋過這馬嘛是 無線電波 kah gamma 光 定定咧研究 ê 對象。藍色是 ùi 雙電離酸素 (O III) 發射來--ê，豬肝紅 是 ùi 水素氣體 發射來--ê。這个星雲 ê 外形就 親像是美人魚，這欲量 星際磁場 是 真方便。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240918/ 影像：Neil Corke 文稿：Natalia Lewandowska (SUNY Oswego) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240918.html Powered by Firstory Hosting

這張足清楚 ê 近紅外線相片是 James Webb 太空望遠鏡 翕--ê，中央有翕著 有環 ê 冰巨行星，海王星。這个暗淡 ê 遙遠世界是 離太陽上遠 ê 行星，差不多是地球到太陽距離 ê 30 倍遠。毋閣 tī 這个精彩 ê Webb 影像內底，這粒行星 暗甲親像是幽靈仝款，這是因為大氣層內底 ê 甲烷 kā 紅外線吸收了了。海王星表面大部份會吸收甲烷，伊頂懸 ê 懸雲，tī 這張相片內底嘛足明顯--ê。海王星上大粒 ê 衛星 海衛一 Triton 就 tī 這張 Webb 影像倒爿頂懸 ê 繞射光尖 遐。因為伊 ê 表面是堅凍 ê 窒素，所以伊比海王星反射太陽光閣較光。這張相片內底有 去 hŏng 揣著 海王星 14 粒衛星 ê 其中七粒，嘛包括海衛一 Triton。海王星 ê 環無遐爾光，伊就 tī 這張新翕--ê 太空行星肖像內底。這个複合環系統，是頭一擺翕甲遮爾清楚。頂擺翕著伊--ê，是 1989 年 8 月 ê 航海家 2 號太空船。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240906/ 影像：NASA, ESA, CSA, STScI, NIRCam 音樂：高小糕 GaoXiaoGao 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240906.html Powered by Firstory Hosting

發射星雲 IC 1805 ê 中心區 有 奇妙形體 ê 宇宙雲。這寡雲會生做這形，是 新形成 ê 星團 Melotte 15 內底 ê 大質量恆星 ê 恆星風 kah 輻射 kā 雕出來--ê。這个 彩色 ê 天景 內底規个攏是這个少年星團，伊差不多才 150 萬歲爾爾。伊 kah 烏暗塗粉雲 ê 外形，攏去予發光 ê 原子氣體 照予光。這張組合影像是 狹頻 kah 闊頻 ê 望遠鏡影像 鬥出來--ê。這个視野差不多有 15 光年闊，內底有 水素 離子、硫磺 離子、kah 酸素 原子。照彼个有名 ê Hubble 色盤 kā in 漆色，分別是 青色、紅色、kah 藍色。闊幅影像表示講，IC 1805 ê 外形會當用一个閣較簡單 ê 名來 kā 號，就叫做 心臟星雲。IC 1805 就 tī 仙后座 方向 7500 光年 遠 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240917/ 影像：Richard McInnis 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240917.html Powered by Firstory Hosting

是按怎水星頂懸這窟大窟隕石坑有兩輾，而且坑底會遮爾平？無人知影。這个奇怪 ê 地形叫做 Vivaldi 隕石坑，有 215 公里闊。相片是 ESA kah JAXA 合作 ê 機器人太空船 BepiColombo tī 這個月初飛過水星附近 ê 時陣，閣翕 ê 詳細影像。像這款 tī 岩石行星 kah 衛星頂懸 ê 大型圓箍仔形結構，一般講來攏是去予 細粒小行星抑是彗星角 挵、抑是 火山爆發 造成--ê。像 Vivaldi 這款 隕石坑，可能 兩款攏捌發生過。可能是先去予太空石頭挵一大窟了後，引起水星內部 ê 熔岩流出來，內底輾才產生這款遮爾平 ê 地形。雙環隕石坑 真罕得看著。形成內環 ê 原因，到今猶是一个 研究主題。BepiColombo 太空船 利用 重力輔助系統 降速 飛過 水星，這是為著欲 tī 2026 年 飛到 太陽系 上內底行星 ê 軌道做準備。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240916/ 影像：ESA, JAXA, BepiColombo, MTM 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240916.html Powered by Firstory Hosting

你敢有看著月娘內底彼个查埔人？這个問題愛看 看的人是毋是有 想像力，有法度 kā 實際上無存在 ê 物件看做咱熟似 ê 圖樣。月娘 表面 ê 紋理有足濟有標誌性 ê 圖樣，毋若佇現代西方文化揣會著，歷史上嘛佇 世界各地 ê 民間故事 內底揣會著。比論講，咱若是綴 月娘 無仝方向去看，就會看著 月娘內底 ê 姑娘仔 抑是 兔仔。咱閣來看 月娘 中央較倚面頂 ê 月海 彼搭，是毋是有成 一个面？就親像是 有一个查埔人 tī 月娘內底。這是因為月海內底有兩个較暗 ê 圓窟仔，就親像是人 ê 目睭。較 hŏng 意外 ê 是，咱若是用天文望遠鏡 斟酌來 kā 看，就會看著月娘相片內底 真正有 一个查埔人，佇月球表面出現一个剪影。這張計畫好勢 ê 相片是 2016 年踮 西班牙 馬德里 ê Cadalso de los Vidrios 翕--ê。毋知你敢有法度 踮月娘面頂揣著你佮意 ê 圖樣？ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240915/ 影像：Dani Caxete 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240915.html Powered by Firstory Hosting

這幅有創意 ê 視覺作品，是一粒一粒 tī 地球天頂看著 ê 月娘 自然色。遮 ê 月盤攏是 tī 無仝時間翕--ê，tī 遮 kā in 一格一格排予好勢。月球有遮爾濟色調，主要是因為地球大氣 ê 變化，而且 月球、地球、太陽 ê 幾何 排列 嘛會變，造成反射日光 ê 結果嘛會無仝。Tī 這內底，上暗 ê 月盤是 地球照 造成 ê 月色。地球照是地球海洋反射日光了後，才閣照 tī 月球較暗彼爿。這 tī 500 年前，Leonardo da Vinci to̍h 有解說過矣。毋閣你若是離電腦螢幕較遠咧，抑是你注意看邊仔較細張 ê 版本，你可能會當看著 da Vinci 彼張上有名 ê 藝術品。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240914/ 影像：Gianni Sarcone 佮 Marcella Giulia Pace 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240914.html Powered by Firstory Hosting

這張速翕 是 8 月 11 tī 國際太空站 翕--ê。這个時陣，太空站是飛 tī 地球 南半球 印度洋 頂懸 430 公里懸 ê 所在。這个壯觀 ê 景色是向南爿 kah 東爿看過去 ê 景色，上下底是地球 ê 地平線，中央經過 紅色 kah 青色 ê 南極光 窗仔布。國際太空站 ê 軌道懸，差不多就是 高層大氣 ê 懸度。極光是 薄縭絲 ê 高層大氣 內底 ê 激發態 酸素原子 發出 ê 輻射。青色發射線 主要是 海拔 100 到 250 公里懸 ê 酸素原子輻射。毋過紅色發射線 是 酸素原子輻射 一直到 海拔 500 公里懸 攏有。這个低地球軌道 ê 景色，除了南極光，嘛有翕著 南半球 ê 星空。獵戶座皮帶 kah 獵戶座星雲 就出現 tī 地球 邊界頂懸，就相片中央倚倒爿遐。天狼星是 大犬座 ê alpha 星，是 地球暗暝天頂 上光 ê 恆星。伊就出現 tī 太空站 下底 ê 南半球夜空，tī 相片正爿中央遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240913/ 影像：NASA, ISS Expedition 71 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240913.html Powered by Firstory Hosting

James Webb 太空望遠鏡 翕--ê 這張 壯麗 ê 拼鬥影像，是 少年星團 NGC 1333 ê 中心。伊是一个 tī 英仙座 方向，大型 英仙座分子雲邊仔 ê 星團。而且伊無偌遠，才 1000 光年遠 爾爾。Webb 太空望遠鏡 ê 深空 探索 包括觀測這區，主要是欲辨識 低質量棕矮星 kah 獨立行星。太空望遠鏡 ê 視野有 2 光年闊，kā 這个厚塗粉星團 ê 恆星工場 包 tī 內底。實際上， 咱已經知影 NGC 1333 內底有 比 100 萬歲閣較少歲 ê 恆星，毋過大部份攏去予 滿四界 ê 星塗 閘牢矣，所以 光學望遠鏡看袂著。這个亂糟糟 ê 環境可能 kah 咱 太陽 tī 45 億年前 拄形成 ê 時陣有成。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240912/ 影像：ESA/Webb, NASA, CSA, A. Scholz, K. Muzic, A. Langeveld, R. Jayawardhana 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240912.html Powered by Firstory Hosting

Slovakia 共和國 kah 波蘭 ê 自然邊界是 Tatra 山脈。Tatra 山 是 Carpathians 山脈 上懸 ê 山。Tùi 天文攝影師 來講，遮是一个足有名 ê 所在。這張相片 是 5 月份翕--ê，你會當看著咱 銀河系 中心 kah 一寡有名 ê 恆星工場，像 內海仔星雲 kah Omega 星雲，就出現 tī Tatra 山脈天頂。恆星工場 內底攏是 水素離子，這是做水 ê 基本元素，咱地球頂懸上濟-- ê 就是水。所有 tī 宇宙 內底咱所知影 ê 性命形式，水是一項 足重要 ê 元素。這个 水，就 tī 相片前景 ê Bialka 河 內底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240911/ 影像：Marcin Rosadziński 文稿：Natalia Lewandowska (SUNY Oswego) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240911.html Powered by Firstory Hosting

你若是 ùi 火星頂懸飛過，會看著啥物？這張相片 是 火星快車號 太空船 7 月 ê 時陣 ùi 火星 足趣味 ê 一區 頂懸翕--ê。相片內底上有名 ê 特徵是 Olympus 山，這是 太陽系 內底上大 ê 火山，就 tī 相片正爿頂懸遐。正爿地平線頂懸有另外一个嘛足大 ê 火星火山：Pavonis 山。咱閣會當看著這粒 紅色行星 ê 表面 有幾若个 圓 ê 隕石坑。予人印象較深 ê 是，咧翕這張相片 ê 時陣，中央倒爿有一粒 烏烏--ê，是 註定會死 ê 火衛一 Phobos。倒爿下底 ê 火星 地表 是 Orcus 塌仔地，伊是長株圓--ê，而且大甲毋是款。是按怎有這个 神祕 ê 結構，到今咱猶毋知。ESA ê 機器人太空船 火星快車號 tī 2003 年發射。Tī 過去足濟 有名 ê 科學 發現 中，伊是一个捌提供證據講 火星頂懸有大型 水體 ê 太空船。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240909/ 影像來源：ESA, DLR, FU Berlin, Mars Express 資料處理 kah CC 2.0 版 ê 許可: Andrea Luck; h/t: Phil Plait 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240909.html Powered by Firstory Hosting