Rauða borðið

Föstudagur 13. nóvember Vikuskammtur: Vika 46 Þau koma að Rauða borðinu, Rósa Líf Darradóttir læknir og dýravinur, Grace Achieng stofnandi og framkvæmdastjóri House of Grace, Kjartan Orri Þórsson Miðausturlandafræðingur og Riitta Anne Maarit Kaipainen, viðskiptafræðingur og stjórnarkona hjá VG og VGR og ræða við Gunnar Smára um fréttir vikunnar sem einkenndust af framhjáhaldi, njósnum, illri meðferð og snjókomu.

Fimmtudagur 12. nóvember Uppljóstrari, Grindavík, reynsluboltar, fyrirgefningin og kommúnulíf Einar Logi Pétursson dýra-aðgerðasinni segir Gunnari Smára frá því hvers vegna hann braust inn í svínabúið Stjörnugrís, hvað hann sá og hverju hann vill áorka með uppljóstrun sinni. Hvað segja Grindvíkingar þremur árum eftir hamfarirnar þegar uppkaupatilboð á húsnæði hafa verið kynnt? Björn Þorláks ræðir við Pál Val Björnsson. Sigurjón Magnússon fær til sín í fréttaspjall Steingerði Steinarsdóttur, Guðmund Þ. Ragnarsson og Sigga Storm í þættinum Reynsluboltar. Séra Vigfús Bjarni ræðir fyrirgefninguna, Ásdís Olsen ræðir við hann. Ásdís Olsen kynnir sér kommúnulífsstíl á Suðurlandi.

Miðvikudagur 11. nóvember Hjólhýsasamfélag, útlendingar, gervigreind, geðvernd, heimsmálin og Samstöðin Hvers vegna er litið niður á fólk sem kýs að lifa öðruvísi? Bergþóra Pálsdóttir, talskona Samtaka hjólabúa, segir mikla fordóma og ranghugmyndir ríkja um hjólabúa og gagnrýnir harðlega framkomu Reykjavíkurborgar, ekki síst Einars Þorsteinssonar. Ásdís Olsen ræðir við hana. Margt er líkt með viðhorfum Íslendinga til útlendinga í dag og fyrir ríflega 30 árum. Stefán Jón Hafstein rýnir í eigin þáttagerð á Stöð 2 í beinni útsendingu árið 1995, 31 árs gamla heimild þegar margir Íslendingar höfðu áhyggjur af örfáum útlendingum. Hanna Kristín Skaftadóttir, dósent og fagstjóri forystu og gervigreindar á Háskólanum á Bifröst, og Þorsteinn Siglaugsson heimspekingur og hagfræðingur ræða við Gunnar Smára um hvaða áhrif gervigreindin hefur þegar haft og mun hafa. Ólafur Þór Ævarsson geðlæknir snýr aftur í umræðu með Birni Þorláks eftir nokkurt hlé. Hann ræðir nýjar rannsóknir um hvernig heilinn starfar og hvernig ný vísindaleg sannindi breyta viðhorfum og meðferð. Vaxandi veikindi opinberra starfsmanna verða einnig til umfjöllunar. Hilmar Þór Hilmarsson prófessor á Akureyri ræðir við Gunnar Smára um heimsmálin, Úkraínu- og Íranstríðin og afleiðingar þeirra á valdahlutföll í heiminum. Gunnar Smári ræðir við nokkra þáttastjórnendur á Samstöðinni utan Rauða borðsins. Þau María Hjálmtýsdóttir í Bókaborðinu, Kári Jónsson í Sjávarútvegsspjallinu, Kristín Helga Gunnarsdóttir við Græna borðið og Sigurður Jóhannesson í Manngildi ræða við hann og Valur Gunnarsson segir frá þætti sem hefur göngu sína innan tíðar, Hvernig í ósköpunum enduðum við hér?

Þriðjudagur 10. nóvember Trumptíminn, neytendur, hagspá, fæðingarorlof, ljóð og elsti bílstjórinn Kristján Guy Burgess alþjóðastjórnmálafræðingur, Þorsteinn Þorgeirsson hagfræðingur og Margrét Valdimarsdóttir afbrotafræðingur ræða við Gunnar Smára um sögulegar kosningar í Bandaríkjunum og stöðu Trump eftir þær. Breki Karlsson formaður Neytendasamtakana ræðir við Björn Þorláks um hvers vegna vöruverð í búðum ætti að hafa lækkað í mörgum tilvikum þegar jafnvel hækkanir hafa orðið ofan á. Róbert Farestveit sviðstjóri hagsviðs Alþýðusambandsins og Ágúst Arnórsson hagfræðingur ræða við Gunnar Smára um horfur í efnahagslífinu en ASÍ sendi nýverið frá sér hagspá. Er íslenska fæðingarorlofskerfið hugsað út frá vinnumarkaði eða þörfum barna? spyr Ásdís Olsen í viðtali við Rögnu Sigurðardóttur, þingmann Samfylkingarinnar og Ásdísi Arnalds, doktor í félagsráðgjöf. Jovana Pavlović og Miriam Petra Ómarsdóttir Awad voru að senda frá sér ljóðabækur og ræða við Gunnar Smára um ljóðið, íslenskuna, pólitík og ástina. Hilmar Mýrkjartansson, 98 gamall, fyrrum atvinnubílstjóri, hóf akstur strætó árið 1948 og ekur enn. Hann segir Birni Þorláks sögur við Rauða borðið.

Mánudagur 9. nóvember Kynlífsglæpir, undanþágur, mistök, hraðakstur og afneitun Drífa Snædal, talskona Stígamóta, segir okkur frá ótrúlegum staðreyndum um glæpi sem koma á borð Stígamóta. Því miður er ekkert lát á. Konur sem leiðast út í vændi gera það oft til þess að eiga fyrir mat, fyrir sig og börnin. Sigurjón Magnús ræðir við Drífu. Ill meðferð dýra á svínabúi hefur valdið undrun og fordæmingu. Andrés Ingi Jónsson, stjórnarformaður í samtökum um dýravelferð, segir að undanþágur stýri eftirliti. Grísir hjá Stjörnugrís fara að hans sögn óttaslegnir inn í dauðann. Björn Þorláks ræðir við Andrés. Stytting framhaldsskólans í þrjú ár var mistök að mati þriggja nemenda í tómstunda- og félagsmálafræði við HÍ, sem láta sig dreyma um að stjórnvöld vindi ofan af skaðanum. Björn Þorláks ræðir við Margréti Norðfjörð, Óliver Elvarsson og Silja Kolbrún Skúladóttir. ,,Þau halda að þau séu ódauðleg og séu í tölvuleikjum,” segir Páll Halldór Halldórsson sem er þekktur sem Rally Palli en hefur rannsakað hræðilega banaslysið sem varð á Krísuvíkurvegi nýlega þar sem 3 ungmenni létust. Ásdís Olsen ræðir við Pál. Jean-Remí Chareyre, sjálfstætt starfandi blaðamaður, gefur lítið fyrir nýlega umfjöllun í Kastljósi um loftslagsmál. Hann ræðir umhverfismál og fjölmiðlun í samtali við Björn Þorláks.

Laugardagur 7. nóvember Helgi-spjall: Sigga Kling Hver er konan á bak við litríku spákonuímyndina? Sigga Kling er engri lík – skrautleg, skemmtileg, skapandi og óhrædd við að fara sínar eigin leiðir. Hún segir frá ástarsorg sem olli straumhvörfum í lífi hennar, móður sinni sem vildi ekki lifa og æskuárunum á Snæfellsnesi hjá ömmu sinni sem þjónaði Thorsurunum og málaði allt húsið blátt til heiðurs Sjálfstæðisflokknum. Sigga deilir líka ljóðmælum, óvæntri innsýn og lífssýn sinni af einstakri hreinskilni. Í einlægu og fjörugu spjalli kynnumst við nýrri hlið á Siggu Kling í viðtali við Ásdísi Olsen.

Sunnudagurinn 8. nóvember Synir Egils: Endalok Trumptímans, svín, uppsagnir, lífskjarakrísa og fjölmiðlar Við ræðum fréttir vikunnar og stöðu samfélagsins við góða gesti; fyrst koma Alma Ýr Ingólfsdóttir, formaður ÖBÍ, Arna Lára Jónsdóttir, þingkona Samfylkingar og Illugi Jökulsson blaðamaður og ræða helstu fréttir og stöðu mála hér heima og erlendis. Þá koma þau Eyrún Magnúsdóttir stofnandi Gímaldsins, Jón Trausti Reynisson framkvæmdastjóri Heimildarinnar og Magnús Magnússon ritstjóri og framkvæmdastjóri Skessuhorns og ræða stöðu fjölmiðla og umræðunnar í samfélaginu. Í lokin fara þeir bræður, Sigurjón Magnús og Gunnar Smári, yfir pólitíkina með sínu nefi.

Föstudagur 6. nóvember Vikuskammtur: Vika 45 Í Vikuskammti ræða í beinni útsendingu Lóa Hjálmtýsdóttir listakona, Heiðar Ingi Svansson útgefandi, Heiðar Örn Sigurfinnsson fréttastjóri Rúv, Þorgerður María Þorbjarnardóttir hjá Landvernd og Bragi Páll skáld fréttir vikunnar í umsjá Björns Þorláks. Kjarnorkutíst upplýsingafulltrúa, raðáhrif í kjölfarið, Reykjavík Bangkok norðursins – eða ekki, upphafið að endalokum Trump, sögur brottrekinna starfsmanna, umhverfismál, hamfarapakki heimilanna, bækur og gott fólk verða til umræðu.

Fimmtudagur 5. nóvember Reynsluboltar, meðvirkni, áhugaleikhús og Frakkland Reynsluboltar þessa vikuna eru Benedikt Jóhannesson stofnandi Viðreisnar, Óðinn Jónsson fyrrum fréttastjóri RÚV og Þórunn Sigurðardóttir menningarfrömuður. Vandinn vegna Landsvirkjunar, orð Ólafs Ragnars og svar Þorgerðar Katrínar voru á dagskrá, íslenska óperan og fleira. „Áttu erfitt með að biðja um hjálp?“ Þá ertu líklega að glíma við meðvirkni, segja Gyða Dröfn Tryggvadóttir og Anton Ísak Óskarsson, en þau þekkja meðvirkni af eigin raun. Þau segja opinskátt frá eigin reynslu, leiðinni út úr meðvirkni og léttinum við að losna úr fjötrum meðvirkninnar í viðtali við Ásdísi Olsen. Vigdís Grímsdóttir rithöfundur, Rúnar Guðbrandsson leikstjóri og leikkonurnar Guðfinna Gunnarsdóttir og Íris Árný Magnúsdóttir ræða við Gunnar Smára um uppfærslu Leikfélags Selfoss á leikgerð upp úr þessari vinsælu bók. Gérard Lemarquis kennari sem lengi var fréttaritari Le Monde og AFP á Íslandi ræðir um ástandið í Frakklandi við Gunnar Smára.

Miðvikudagur 4. nóvember Trumptíminn, fæðingarorlof, pendúlhreyfingar, tónlist og lagaleg álitaefni Friðjón R. Friðjónsson varaborgarfulltrúi, Magnús Helgason sagnfræðingur og Ólafur Þ. Harðarson prófessor fara yfir kosningaúrslitin í Bandaríkjunum í spjalli við Gunnar Smára í auka-Trumptíma. Marka kosningarnar endalok Trumptímans? Ásdís Olsen ræðir við Karítas Ólafsdóttur móður og sálfræðing en hún neitar að láta stjórnvöld ráða hennar eigin barneignum. Forgangsröðun fjármuna tekur ekki mið af þörfum barna. Þetta segir Grímur Atlason hjá Geðhjálp. Hann og Margrét Valdimarsdóttir doktor í afbrotafræði ræða við Björn Þorláks um muninn á vistun barns og brú yfir fljót. Á föstudag verður frumflutt stórvirkið ANOK eftir Högna Egilsson í Hallgrímskirkju. Hallveig Rúnarsdóttir sópransöngkona er í aðalhlutverki í flutningnum og ræðir ásamt tónskáldinu Högna verkið í samtali við Björn Þorláks. Grímur Atlason hjá Geðhjálp og Margrét Valdimarsdóttir, dósent við HÍ, ræða kosningarnar í Bandaríkjunum í gær, áhrif þeirra á heiminn og þar á meðal hér á Íslandi. Björn Þorláks ræðir við þau. Gísli Tryggvason lögmaður fer yfir lagaleg álitaefni tengd fréttum líðandi stundar. Uppsagnir og uppsagnarákvæði, minnkandi samkeppni á matvörumarkaði og Landsvirkjunarmálið eru þar á meðal. Björn Þorláks ræðir við Gísla.